စစ်ကိုင်းတိုင်း၊ ချောင်းဦးမြို့နယ်အတွင်း လမ်းပိုင်း ၅ ခုအား ဖြတ်သန်းခွင့်ယာယီပိတ်ထားကြောင်း ချောင်းဦးမြို့နယ် ပြည်သူ့ကာကွယ်ရေးအဖွဲ့က အသိပေးကြေညာသည်။
ယနေ့ (ဖေဖော်ဝါရီ၂၃ ရက်) မွန်းလွဲပိုင်းတွင် ချောင်းဦးမြို့နယ် ပြည်သူ့ကာကွယ်ရေးအဖွဲ့က အရေးပေါ်သတိပေးကြေညာချက် တစ်စောင် ထုတ်ပြန်ခဲ့ရာ ချောင်းဦးမြို့နယ်အတွင်း မုံရွာ – ချောင်းဦး – မြင်းမူ လမ်းပိုင်း၊ ချောင်းဦး – ပခုက္ကူလမ်းပိုင်း၊မုံရွာ – အမြင့် – တောကျောင်းကြီးလမ်းပိုင်း၊ခင်မွန် – ကျီကုန်း – ရွှေဒါးကျလမ်းပိုင်း၊ ချောင်းဦး – အမြင့်လမ်းပိုင်းများကို ယခုကြေညာချက်ထုတ်ပြန်ချိန်မှစ၍ ယာယီပိတ်ထားလိုက်ကြောင်း ဖော်ပြထားသည်။
ယာယီပိတ်ထားချိန်အတွင်း ကြေညာချက်ပါလမ်းပိုင်းများကို လုံးဝအသုံးမပြုကြပါရန်နှင့်လိုက်နာခြင်းမရှိသူတို့၏လုံခြုံရေးကို အာမမခံပါကြောင်း၊ အထက်ပါလမ်းပိုင်းများတွင်သွားလာနေကြသောမော်တော်ယာဉ်များအနေဖြင့် အန္တရာယ်ကင်းရှင်းစေရန်အတွက် ရောက်ရာအရပ်တွင်ခေတ္တရပ်နားထားကြပါရန်နှင့် အဆိုပါလမ်းပိုင်းများကိုလက်ရှိအသုံးပြုလျှက်ရှိသော မိမိ၏ဆွေမျိုးမိတ်ဆွေများကို ထပ်ဆင့်အကြောင်းကြားပေးကြပါရန် မေတ္တာရပ်ခံအပ်ကြောင်း၊ လမ်းပိုင်းများပြန်လည်ဖွင့်လှစ်မည့်အချိန်ကို ထပ်မံကြေညာသွားမည်ဟုချောင်းဦးမြို့နယ် ပြည်သူ့ကာကွယ်ရေးအဖွဲ့က အသိပေးထားသည်။
“ကျွန်တော်တို့ လိုအပ်လို့ ထုတ်ပြန်ထားတာ။မိဖပြည်သူတွေ လိုက်နာပေးဖို့ ထပ်ပြီး မေတ္တာရပ်ခံပါတယ်”ဟု ချောင်းဦးပြည်သူကာကွယ်ရေးအဖွဲ့က ပြောသည်။
Public Service Announcement
ယမန်နေ့ညပိုင်းက ချောင်းဦး-ဆင်ဖြူရှင်လမ်းတွင်ပေါက်ကွဲသံတစ်ခုထွက်ပေါ်ခဲ့ပြီး ယနေ့နံနက်ပိုင်းကချောင်းဦးမြို့နယ် ကံကြီးကုန်းရွာ၏အရှေ့ဘက် အနီးနားဝန်းကျင်တွင် သေနတ်ပစ်ခတ်သံများဆက်တိုက်ပေါ်ထွက်ခဲ့ကြောင်း ဒေသခံများက ပြောသည်။
