ကနီမြို့နယ်တွင် သုံးရက်ကြာဖြစ်ပွားသော တိုက်ပွဲအတွင်း စစ်ကောင်စီဘက်က ၂၀ဦးခန့်သေဆုံးပြီး မဟာမိတ်တပ်ပေါင်းစုဘက်မှ ရဲဘော် သုံးဦး ဒဏ်ရာအနည်းငယ်ရခဲ့သည်ဟု ပြည်သူ့ကာကွယ်ရေးအဖွဲ့ဘက်က ထုတ်ပြန်သည်။
ဖေဖော်ဝါရီ ၂၂ရက်မှ ဖေဖော်ဝါရီ ၂၄ရက်အတွင်း ဖြစ်ပွားသော တိုက်ပွဲအခြေအနေကို ကနီမြို့နယ်ပြည်သူ့ကာကွယ်ရေးအဖွဲ့ဖြစ်သော ရွှေတြိဂံတပ်ရင်း Golden Triangle Force – GTFကထုတ်ပြန်သည်။
ကနီမြို့နယ်၊ ငါးဖျက်ရွာနှင့် ပန်းဆိုင်ရွာကြားတွင် ဖေဖော်ဝါရီလ၂၂ ရက်နေ့ မနက်ပိုင်းမှစ၍ တိုက်ပွဲစတင်ဖြစ်ခဲ့ပြီး အကြမ်းဖက်စစ်ကောင်စီကို ရွှေတြိဂံတပ်ရင်း တပ်ခွဲ(၁)၊ KLG PDF၊MK&The Boy၊ ပကဖ၊ ဒေသတွင်းမဟာမိတ်တပ်ပေါင်းစုများက ပူးပေါင်းတိုက်ခိုက်ခဲ့သည်ဟု သတင်းထုတ်ပြန်ထားသည်။
ပြည်သူ့ကာကွယ်ရေးမဟာမိတ်များကတိုက်ခိုက်မှုကြောင့်စစ်ကောင်စီဘက်က ဒဏ်ရာရသွားသူများထဲတွင် အရာရှိအချို့လည်းပါဝင်သည်။ ဒဏ်ရာရသူများကို ပန်းဆိုင်းကျေးရွာ ဘုန်းကြီးကျောင်းအတွင်း တပ်စွဲ၍ ဆေးကုသခဲ့ပြီးယမန်နေ့(ဖေဖော်ဝါရီလ၂၄ရက်)နေ့လယ် နှစ်နာရီခန့်တွင် ရဟတ်ယာဉ်ဖြင့်လာသယ်သွားသည်ဟု ဒေသခံများကပြောသည်။
Public Service Announcement
အကြမ်းဖက်စစ်ကောင်စီသည် ကနီနှင့် မင်ကင်းဒေသသို့ လွန်ခဲ့သည့် တစ်ပတ်ခန့်ကတည်းက တစ်ကျော့ပြန် စစ်ကြောင်းထိုးနေ၍ ဒေသခံများ ဘေးလွတ်ရာ ထွက်ပြေးတိမ်းရှောင်နေရဆဲဖြစ်သည်။
ဖေဖော်ဝါရီ ၂၀ ရက်က စစ်ကြောင်းထိုးလာသောတပ်နှင့် ဒေသခံပြည်သူ့ကာကွယ်ရေးတပ်ဖွဲ့တို့ကြားတိုက်ပွဲပြင်းထန်စွာဖြစ်ပွားပြီး စစ်ကောင်စီတပ်မှ ၁၅ ဦးမှ ၃၀ ဦးအတွင်းသေဆုံးခဲ့သည်ဟု ဒေသခံကာကွယ်ရေးတပ်ဖွဲ့များကထုတ်ပြန်ထားသည်။
