စစ်ကောင်စီ၏ ခြေလျှင်တပ်ကို ကသာနယ် ချောင်းဝရွာအနီးတွင် မိုင်းဆွဲ တိုက်ခိုက်ရာ နှစ်ဦးသေ၊ ငါးဦးထက်မနည်းဒဏ်ရာရဟု မြို့လှ PDFပြော

အကြမ်းဖက်စစ်ကောင်စီ၏ ခြေလျှင်တပ်ကို ကသာမြို့နယ် ချောင်းဝကျေးရွာ အနီးတွင် မိုင်းဆွဲတိုက်ခိုက်ခဲ့ရာ စစ်ကောင်စီတပ်သား နှစ်ဦးသေဆုံးပြီး ငါးဦးထက်မနည်း ဒဏ်ရာအပြင်း အထန်ရရှိကြောင်း မြို့လှ PDFက ထုတ်ပြန်သည်။

ယနေ့(မတ်လ ၂၃ရက်)နံနက် ၆နာရီခန့်၌ အင်အား ၅၀ခန့်ပါ အကြမ်းဖက် စစ်ကောင်စီတပ် သည် မင်းကျောင်းကုန်းရွာမှ ချောင်းဝရွာဖက်သို့ ကန်ဘောင်လမ်းအတိုင်း ခြေလျင်စစ် ကြောင်းထိုးခဲ့သည်ဟု ဆိုသည်။

အဆိုပါ စစ်ကောင်စီစစ်ကြောင်းကို လမ်းခုလတ် တောစပ်နေရာတစ်ခုတွင် ဗိုလ်မိုဃ်းကြိုး ဦးဆောင်သော မြို့လှ PDFတပ်မှ မိုင်း ၈ လုံးဖြင့် စောင့်ကြို မိုင်းဆွဲ တိုက်ခိုက်ခဲ့သည်။

တိုက်ခိုက်မှုအတွင်း သေဆုံးဒဏ်ရာရရှိသည့် စစ်ကောင်စီတပ်သားများကို စက်လှေများဖြင့် သယ်ယူလျှက်ရှိကြောင်းလည်း ထုတ်ပြန်ချက်၌ဖော်ပြသည်။

Public Service Announcement

ထို့အပြင် မြို့လှ PDF မှ အထိအခိုက်မရှိ အောင်မြင်စွာ ဆုတ်ခွာနိုင်ခဲ့ကြောင်း လည်း အသိပေးထားသည်။

ယနေ့ နံနက် ၉နာရီခန့်ကလည်း စစ်ကောင် စီ၏ ရိက္ခာတင်သင်္ဘော ၂စီးသည် ရွှေကူမြို့မှ စတင်ထွက်ခွာလာပြီး မြစ်ကမ်းတလျှောက်တွင် စစ်ကောင်စီတပ်မှ လုံခြုံရေးယူနေသည်ဟု မြို့လှ PDFက အသိပေးသည်။