စစ်တပ်အာဏာသိမ်းပြီးတဲ့နောက် မြန်မာနိုင်ငံတွင်းမှာ နိုင်ငံတကာအလုပ်သမာရေးရာ စံနှုန်းတွေကို လိုက်နာမှုမရှိတဲ့အပေါ် စုံစမ်းစစ်ဆေးရေးကော်မရှင်တစ်ရပ်ဖွဲ့စည်းဖို့အပြည်ပြည်ဆိုင်ရာအလုပ်သမားအဖွဲ့အစည်းကြီး (ILO) က မနေ့က မတ်လ ၂၅ ရက်မှာထုတ်ပြန်လိုက်ပါတယ်။
မြန်မာနိုင်ငံအတွင်းမှာ အလုပ်သမားအဖွဲ့အစည်းတွေ လွတ်လွတ်လပ်လပ်ဖွဲ့စည်းခွင့်ရှိမရှိ နဲ့အတင်းအဓမ္မစေခိုင်းတာတွေရှိမရှိကို စုံစမ်းစစ်ဆေးရေးကော်မရှင်က စုံစမ်းသွားမှာပါ။
ဒါအပြင် အရပ်သားပြည်သူတွေအပေါ် အကြမ်းဖက်သတ်ဖြတ်မှုတွေ ကျယ်ကျယ်ပြန့်ပြန့်ပေါ်ပေါက်နေပြီး ဒီလိုသတ်ဖြတ်ခံရသူတွေထဲမှာကလေးသူငယ်တွေပါဝင်နေတယ်လို့ ILO ကြေညာချက်မှာဖော်ပြထားပါတယ်။
မလွှကုန်းမီးရထားသမဂ္ဂက အဖွဲ့ဝင် ကိုအောင်ကိုလတ် ကို စစ်ကောင်စီရဲ့ ဖမ်းဆီးနှိပ်စက်တဲ့လုပ်ရပ်ကိုလည်း ILOက အလေးထားဖော်ပြထားပြီး ဒီလို လုပ်ရပ်တွေ ချက်ချင်းရပ်တန့်ပြစ်ရမယ်လို့ ဆိုထားပါတယ်။
မြန်မာနိုင်ငံမှာ အလုပ်သမားရော ၊အလုပ်ရှင် အဖွဲ့အစည်းတွေပါ လွတ်လပ်စွာဖွဲ့စည်းတည်ထောင်ခွင့်ရှိရမှာဖြစ်ပြီး သူတို့အပေါ် အကြမ်းဖက်မှုတွေ ၊ တရားလက်လွတ်ဖမ်းဆီးတာတွေ မရှိသင့်ဘူးလို့ ILO က ထောက်ပြပါတယ်။
အလုပ်သမားအရေးတက်ကြွလှုပ်ရှားသူတွေ ၊ အလုပ်သမားသမဂ္ဂအဖွဲ့ဝင်တွေ တွေအပေါ် အကြမ်းဖက်တာ ၊ဖိအားပေးတာ ၊ တရားလက်လွတ်ဖမ်းဆီးထိန်းသိမ်းတဲ့လုပ်ရပ်တွေကို လည်း ILO က ရှုတ်ချထားပါသေးတယ်။
မြန်မာနိုင်ငံအတွက် ဖွဲ့စည်းမယ့် စုံစမ်းစစ်ဆေးရေးကော်မရှင်ဟာ ILO ရဲ့ အမြင့်ဆုံးစုံစမ်းစစ်ဆေးရေး လုပ်ထုံးလုပ်နည်းဖြစ်ပါတယ်။
အဲဒီကော်မရှင်ဟာ အဖွဲ့ဝင် ၃ ဦးပါဝင်မှာဖြစ်ပြီး နိုင်ငံတကာအလုပ်သမားအခွင့်အရေးဆိုင်ရာ စံနှုန်းတွေကို ချိုးဖောက်တဲ့ အဖွဲ့ဝင်နိုင်ငံ တစ်နိုင်ငံအပေါ် စုံစမ်းစစ်ဆေးဖို့ ဖွဲ့စည်းရတာပါ။
ဒီလိုကော်မရှင်မျိုးကို ILO သမိုင်းတလျှောက်မှာ ၁၄ ကြိမ် ဖွဲ့စည်းဖူးတယ်လို့သိရပါတယ်။
မြန်မာနိုင်ငံဟာ ILO အဖွဲ့ကြီး ကို ၁၉၄၈ ခုနှစ်က ဝင်ရောက်ထားတဲ့အဖွဲ့ဝင် နိုင်ငံဖြစ်ပါတယ်။