ကရင်အမျိုးသားအစည်းအရုံး(KNU) တပ်မဟာ(၅) နယ်မြေ ဖာပွန်ခရိုင်တွင် ဧပြီလဝက်အတွင်း တိုက်ပွဲ ၁၇၄ ကြိမ်ဖြစ်ခဲ့ရာ စစ်ကောင်စီတပ်မှ ၈၁ဦး သေဆုံးခဲ့ကြောင်း တပ်မဟာ(၅)က သတင်းထုတ်ပြန်သည်။
ဧပြီ ၁ရက်မှ ၁၅ရက်အထိ တိုက်ပွဲသတင်းကို ယနေ့ ထုတ်ပြန်ခဲ့ခြင်းဖြစ်သည်။
စစ်ကောင်စီတပ်မှ သေဆုံးခဲ့သည့် ၈၁ ဦးတွင် တပ်ခွဲမှူး တစ်ဦး၊ တပ်ကြပ်တစ်ဦးနှင့် နှင့် ဒု-တပ်ကြပ်တစ်ဦးတို့ပါဝင်ပြီး ၄၄ဦး ဒဏ်ရာရခဲ့ကြောင်း ဖော်ပြထားသည်။
အကြမ်းဖက်စစ်ကောင်စီ၏ သယ်ယူပို့ဆောင်ရေးမော်တော်ကား(၂)စီးအား ဖျက်ဆီးနိုင်ခဲ့ပြီး ရိက္ခာနှင့်လက်နက်ခဲယမ်းများသယ်ယူရန်အသုံးပြုသည့် တံတား ၃စင်းကိုလည်း ဖျက်ဆီးနိုင်ခဲ့ကြောင်း ထုတ်ပြန်သည်။
အဆိုပါ တိုက်ပွဲများ၌ တပ်မဟာ(၅) ၏ စစ်သည်များ ထိခိုက်ကျဆုံးမှုမရှိသော်လည်း တပ်မဟာ အချင်းချင်း ကြား ပူးပေါင်းစစ်ဆင်ရာ၌ ပါဝင်သည့် တပ်မဟာ(၁) မှ စစ်သည် တစ်ဦး ကျဆုံးပြီး ဒဏ်ရာရသူ ၇ဦးရှိသည်ဟု ဆိုသည်။
အကြမ်းဖက်စစ်ကောင်စီတပ်က ကျေးရွာများအတွင်း လက်နက်ကြီးများပစ်ခတ်တိုက်ခိုက်ခဲ့၍ ပြည်သူ ၂ဦး အသက်ဆုံးရှုံးခဲ့ရကြောင်း ဖော်ပြထားသည်။
အကြမ်းဖက်စစ်ကောင်စီတပ်နှင့် ၎င်း၏ခါးပိုက်ဆောင် တပ်(BGF)တို့မှ ဒေသခံပြည်သူများ၏ ကျေးရွာနှင့် လုပ်ငန်းခွင်များ အတွင်း လက်နက်ကြီးဖြင့် အချက် ၄၀၀ ကျော် ပစ်ခတ်ခဲ့သည်ဟု တပ်မဟာ(၅)က သတင်းထုတ်ပြန်သည်။