ထီးချိုင့်မြို့နယ်တွင် ကျေးရွာများသို့ စစ်ကြောင်းထိုးလာသည့် စစ်ကောင်စီတပ်အား မိုင်းခွဲတိုက်ခိုက်ခဲ့ကြောင်း Eagles Army – HPDF က ယနေ့(ဧပြီ ၂၁) ထုတ်ပြန် သည်။
ယနေ့နံနက် ၄ နာရီခန့်တွင် ထီးချိုင့်မြို့နယ်အရှေ့ခြမ်း၌ တပ်စွဲထားသော စစ်ကောင်စီတပ်မှ တုံလုံကျေးရွာသို့ ဝင်ရောက်ကာ နေအိမ်အချို့အား မီးရှို့ဖျက်ဆီးပြီးအပြန်လမ်းမှစောင့်ကြို၍ မိုင်းဆွဲခဲ့ခြင်းဖြစ်ကြောင်း HPDF က ပြောသည်။
“စကစတပ်တွေက မနက် ၄ နာရီလောက်က တုံလုံရွာကိုရောက်တာဗျ။ ရောက်ပြီးတော့ ပြည်သူနေအိမ် တစ်လုံးကို မီးထပ်ရှို့ပြန်တာ။ အစောကလည်း ခဏခဏရှို့တာတွေ အိမ်တွေကိုဖျက်ဆီးတာတွေတော်တော်များတယ်”ဟု HPDF မှ တော်လှန်ရေးရဲဘော်တစ်ဦးက ပြောသည်။
တုံလုံကျေးရွာသို့ ဝင်မွှေသည့် စစ်ကောင်စီတပ်များ သည် ယနေ့နံနက် ၁၀နာရီခန့်တွင် မိုးပြာဆောက်လုပ်ရေးလုပ်ငန်းခွင်အနီးသို့ ကြိုပွိုင့်ထွက်လာစဥ် မိုင်းခွဲတိုက်ခိုက်ခဲ့ရာ ခြောက်ဦးသေဆုံးပြီး လေးဦးဒဏ်ရာရသွားကြောင်း ၎င်းက ဆက်ပြောသည်။
Public Service Announcement
အကြမ်းဖက်စစ်ကောင်စီက ထီးချိုင့်မြို့နယ်အား အင်တာနက်လိုင်းများ ဖြတ်တောက်ခဲ့ပြီးနောက် ပြည်သူနေအိမ်များအား မီးရှို့ဖျက်ဆီးခြင်းနှင့် အပြစ်မဲ့ပြည်သူများအား ဖမ်းဆီးခြင်းများ ဆက်တိုက်လုပ်ဆောင်လျက်ရှိသည်။
