ရွှေဘိုမြို့နယ် တည်သီးတောရွာတပ်စွဲထားသော စစ်ကောင်စီတပ်အား ဒေသတွင်း ပြည်သူ့ကာကွယ်ရေးအဖွဲ့ ခုနစ်ဖွဲ့ မိုင်းဆွဲတိုက်ခိုက်

▪️စစ်​​ကောင်စီတပ်သား သုံးဦး​သေဟုဆို

စစ်ကိုင်းတိုင်း၊ ရွှေဘိုမြို့နယ် တည်သီးတောကျေးရွာတွင်တပ်စွဲထားသော အကြမ်းဖက်စစ်ကောင်စီတပ်အား ဒေသတွင်း ပြည်သူ့ကာကွယ်ရေးအဖွဲ့ ခုနစ်ဖွဲ့က မိုင်းဆွဲတိုက်ခိုက်ရာ စစ်အုပ်စုဘက်မှ သုံးဦးသေဆုံးကြောင်း ဗိုလ်ကျားရိုင်း – ပ.က.ဖ ရွှေဘိုအဖွဲ့က သတင်းထုတ်ပြန် သည်။

ယမန်နေ့ (ဧပြီလ ၂၅ ရက်)က ရွှေဘိုမြို့နယ်တည်သီး‌ တောကျေးရွာတွင် တပ်ချထားသော အကြမ်းဖက်စစ်တပ်အား မဟာမိတ်ညီနောင်များဖြစ်ကြသော ဗိုလ်ကျားရိုင်း – ပ.က.ဖ ရွှေဘို အဖွဲ့၊ C&T SHWEBO၊ ဖားရွှေကျော်အဖွဲ့၊ SNAKE EYE PDF၊ Alpha 7၊ ဒေါင်းမာန်အဖွဲ့ နှင့် တပ်ပေါင်းစု (၂)တို့ မှ သွားရောက်မိုင်းဆွဲတိုက်ခိုက်ခဲ့ရာ အကြမ်းဖက်စစ်သား သုံးဦးသေဆုံးပြီး နှစ်ဦးအပြင်းထန်ဒဏ်ရာရကာ မဟာမိတ်ညီနောင်များမှာ ထုံးစံအတိုင်း အထိခိုက်မရှိ ဘေးရန်ကင်းစွာဖြင့် ပြန်လည်ဆုတ်ခွာနိုင်ခဲ့သည်ဟု ထုတ်ပြန်ချက်တွင် ရေးသားထားသည်။

တည်သီးတောကျေးရွာသည် ရွှေဘိုမြို့နယ် အရှေ့ခြမ်းတွင်တည်ရှိပြီး ယမန်နေ့ညပိုင်းက ဖြစ်ပွားခဲ့ခြင်းဖြစ်ကြောင်း၊ အကြမ်းဖက်စစ်တပ်မှာ မိုင်းဆွဲတိုက်ခိုက်ခံရပြီးနောက် ရွှေဘို-ကျောက်မြောင်းလမ်းပေါ်ရှိ ကြက်ခြံတစ်ခုကို မီးရှို့ခဲ့ကြောင်း ဒေသတွင်းသတင်းရင်းမြစ်များက ပြောသည်။

Public Service Announcement

ထုတ်ပြန်ချက်နှင့်ပတ်သက်၍ ဗိုလ်ကျားရိုင်း – ပ.က.ဖ ရွှေဘို အဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်းမရှိသေးပါ။

ဧပြီ ၃ ရက်ကလည်း တည်သီးတောကျေးရွာရှိ အကြမ်းဖက်စစ်တပ်နှင့် ပျူစောထီးများကို ဒေသတွင်း PDFပူး​ပေါင်းဖွဲ့မှသွား​ရောက်တိုက်ခိုက်ရာ အကြမ်းဖက်စစ်သား နှစ်ဦး​သေဆုံးကာ ​လေးဦးထိခိုက်ဒဏ်ရာများ ရရှိသွားခဲ့သေးသည်။