ကေအဲန်ယူ ဖာပွန်ခရိုင်မှာ မနေ့ကဖြစ်ခဲ့တဲ့ တိုက်ပွဲဖြစ်စဉ်တွေအတွင်း KNLA တပ်မဟာ ၅ ဘက်က ဗျူဟာမှူးဖြစ်သူ ဗိုလ်မှူးကြီးစောထူးကရှော ကျဆုံးသွားခဲ့တယ်လို့ တပ်မဟာ ၅ သတင်းအရင်းအမြစ်ထံကနေ သိရပါတယ်။
ဖာပွန်ခရိုင် သံလွင်မြစ်အနီးမှာရှိတဲ့ စစ်ကောင်စီရဲ့ ကျောက်ညှက်စခန်းကို မနေ့ ဧပြီ ၂၉ ရက် မနက်ပိုင်းက ကရင်အမျိုးသားလွတ်မြောက်ရေးတပ်မတော် KNLA တပ်မဟာ ၅ ပူးပေါင်းအဖွဲ့က တိုက်ခိုက်သိမ်းပိုက်ခဲ့ပြီး စခန်းကိုသိမ်းဆည်းရခဲ့တာဖြစ်ပါတယ်။
ဗိုလ်မှူးကြီးစောထူးကရှောဟာ အဲဒီစခန်းသိမ်းတိုက်ပွဲမှာကျဆုံးခဲ့တာလို့ သတင်းတွေထွက်နေပေမယ့် အတည်ပြုလို့တော့မရသေးပါဘူး။
ကျောက်ညှက်စခန်းဟာ ဖာပွန်မြို့အခြေစိုက် စစ်ကောင်စီရဲ့ (၄၃၄)တပ်ရင်းစခန်းဖြစ်ပြီး ဒုတပ်ရင်းမှူးအဆင့်ရှိသူက စခန်းထိုင်တာဖြစ်ပါတယ်။ မနေ့ကစခန်းသိမ်းတိုက်ပွဲမှာ စစ်ကောင်စီဘက်က ထိခိုက်ကျဆုံးမှုများပြားခဲ့တယ်လို့ သိရပါတယ်။
Public Service Announcement
စစ်ကောင်စီရဲ့ ကျောက်ညှက်စခန်းကို KNLA တပ်မဟာ ၅ ပူးပေါင်းအဖွဲ့ရဲ့ တိုက်ခိုက်သိမ်းပိုက်ခံရပြီးတဲ့နောက် စစ်ကောင်စီတပ်ဟာ လေယာဉ်နဲ့ သံလွင်မြစ်နားမှာရှိတဲ့ မယ်နုထာ့ကျေးရွာကို လာရောက်ဗုံးကြဲတိုက်ခိုက်ခဲ့တယ်လို့ သိရပါတယ်။
စစ်ကောင်စီရဲ့လေကြောင်းတိုက်ခိုက်မှုအတွင်းမှာ KNLA တပ်မဟာ ၅ ရဲ့ စစ်ဆင်ရေးဗျူဟာမှူးလည်းဖြစ် ကေအဲန်ယူ-ဖာပွန်ခရိုင်ရဲ့ ခရိုင်အလုပ်အမှုဆောင်တစ်ဦးလည်းဖြစ်တဲ့ ဗိုလ်မှူးကြီးစောထူးကရှောဟာ ကျဆုံးသွားခဲ့တာဖြစ်တယ်လို့ တပ်မဟာ ၅ နဲ့နီးစပ်တဲ့ သတင်းရင်းမြစ်တွေက ပြောပါတယ်။
