စစ်ကိုင်းတိုင်း၊ မုံရွာမြို့တွင် အရပ်ဝတ်များဖြင့်လိုက်ပါလာသော စစ်ကောင်စီယာဥ်တန်း မိုင်းဆွဲတိုက်ခိုက်ခံရပြီး အကြမ်းဖက်စစ်သားနှစ်ဦးသေဆုံးကြောင်း Monywa People Defence Force (MPDF)က ထုတ်ပြန်သည်။
ယနေ့(ဧပြီ ၃၀ရက်)ညနေ ၃ နာရီဝန်းကျင်က မုံရွာမြို့အခြေစိုက် မဟာမိတ်ညီနောင်များပူးပေါင်းပြီး မုံရွာမြို့၊ ကျောက္ကာလမ်း ငွေကမ္ဘာမင်းဆီဆိုင်အနီးတွင် အရပ်ဝတ်စစ်ကောင်စီယာဥ်တန်းအား မိုင်းဆွဲကာ လက်နက်ငယ်များဖြင့် ပစ်ခတ်တိုက်ခိုက်ခဲ့ကြောင်း၊ စစ်ဆင်ရေးဦးတည်ချက်နေရာတွင် အရပ်ဝတ်စစ်သားနှစ်ဦးသေဆုံးပြီး လေးဦးဒဏ်ရာပြင်းထန်စွာရရှိသွားသည်ဟု သတင်းအတိအကျရရှိကြောင်း Monywa People Defence Force (MPDF)က ပြောသည်။
အဆိုပါစစ်ဆင်ရေးအား Monywa People Defence Force(MPDF)၊ Special Regional Attack Force (SRAF) မုံရွာခရိုင် တပ်ရင်း (၁)၊ Special Force 11 PDF၊ သပြေညိုပြောက်ကျား တပ်ဖွဲ့၊ Black Dragon Special Task Force အဖွဲ့များက ပူးပေါင်းဆောင်ရွက်ခဲ့ခြင်းဖြစ်ပြီး မဟာမိတ်ရဲဘော်များ အန္တရာယ်ကင်းစွာ ဆုတ်ခွာနိုင်ခဲ့ကြောင်း ၎င်းအဖွဲ့များက အသိပေးသည်။
“အိမ်စီးကားသုံးစီး လူ၁၅ယောက် အရပ်၀တ်တွေနဲ့ ပစ္စည်းတွေရော ပါပါတယ်။သူတို့ကားတွေ ကျောက္ကာဘက်ကိုလမ်းကြောင်းသွားတဲ့အချိန် ပစ်ခတ်ခဲ့တာပါ”ဟု ပါဝင်တိုက်ခိုက်ခဲ့သည့် Special Regional Attacks Forces-MWA အဖွဲ့တာဝန်ရှိသူက ပြော သည်။
Public Service Announcement
ယခုအခါ စစ်ရေးမငြိမ်သက်မှုများကြောင့် မုံရွာ-အရာတော်-ထီးဆောင်းလမ်းပိုင်းနှင့် မုံရွာ-မန္တလေးလမ်းပိုင်းသွားလာသော ပြည်သူများအနေဖြင့် အကြမ်းဖက်စစ်ကောင်စီတပ်ကားများနှင့် နီးကပ်စွာမောင်းနှင်ခြင်းမပြုကြရန်နှင့် သတိပြုသွားလာကြရန် မုံရွာခရိုင် ပြည်သူ့ကာကွယ်ရေးတပ်ဖွဲ့(MPDF) က သတိပေးထားသည်။
