ကြာအင်းဆိပ်ကြီးမြို့နယ် ခလယ်ကျေးရွာမှာ ဒီကနေ့ မနက် ၁၀ နာရီအချိန်ခန့်ကစပြီး KNLA နဲ့ စစ်ကောင်စီတပ်တို့အကြား ထိတွေ့ပစ်ခတ်မှု ထပ်မံဖြစ်ပွားခဲ့တယ်လို့ ဒေသခံတွေထံကနေ သိရပါတယ်။
ဒီကနေ့ မေ ၁ ရက်နေ့ ၁၀ နာရီအချိန်ခန့်ကစပြီး နေ့လယ်ပိုင်းအချိန်ထိ ခလယ်ကျေးရွာ ကွက်သစ်ဘက်ခြမ်းမှာ နှစ်ဖက်တပ်တွေအကြား ထိတွေ့ပစ်ခတ်မှုဖြစ်ပွားခဲ့တာဖြစ်ပြီး ထိခိုက်မှုတွေတော့ လတ်တလောမှာ မသိရသေးပါဘူး။
“အလုံးကြီးရော အသေးရော ဆက်တိုက်ပဲ။ ခလယ်ကွက်သစ်ဘက်မှာ ဆက်တိုက်ပစ်နေပါတယ်။ ပြန်လာဖို့ အစီအစဉ်ရှိသူများ မပြန်လာကြပါနဲ့ဦး” လို့ ဒေသခံတစ်ဦးက သူ့ရဲ့လူမှုကွန်ယက်မှာ ရေးသားထားပါတယ်။
ထိတွေ့တိုက်ပွဲတွေဖြစ်ပွားနေစဉ်အတွင်း စစ်ကောင်စီတပ်ဟာ လက်နက်ကြီးတွေနဲ့ ပစ်ခတ်မှုတွေလုပ်ဆောင်ခဲ့တယ်လို့ ဒေသခံတွေရဲ့ ပြောကြားချက်အရ သိရပါတယ်။
Public Service Announcement
ပြီးခဲ့တဲ့ ဧပြီ ၂၃ ရက်ကစပြီး ကေအဲန်ယူ-ဒူးပလာယာခရိုင် တပ်မဟာ ၆ ဝင်းရေးမြို့နယ် ခလယ်တံခွန်တိုင်မှာ KNLA တပ်နဲ့ စစ်ကောင်စီတပ်တို့အကြား ထိတွေ့ပစ်ခတ်မှုစတင်ဖြစ်ပွားခဲ့ပြီး စစ်ကောင်စီဘက်က စစ်ရေးအင်အားတွေ ပိုမိုတိုးချဲ့လာခဲ့ကာ နှစ်ဖက်ထိတွေ့တိုက်ပွဲတွေ ဒီကနေ့အထိ ဖြစ်ပွားနေတာပါ။
တိုက်ပွဲကြောင့် ဝင်းရော်ဒေသက ကျေးရွာတွေဖြစ်ကြတဲ့ ခလယ် တံခွန်တိုင် နန်းသိုင်းထွန်း ဒိုင်လွတ် ကမော့ဝမ်း စတဲ့ ကျေးရွာတွေက ဒေသခံအရပ်သားပြည်သူ ထောင်ချီဟာ ဘေးလွတ်ရာကို တိမ်းရှောင်နေခဲ့ကြရတာ ဖြစ်ပါတယ်။
