ရွှေဘိုနယ်တွင် ရွာများမီးရှို့ဖျက်စီးပြီးနောက် စစ်ကြောင်းထိုးနေသောစစ်အုပ်စုကို ဒေသကာကွယ်ရေးတပ်များ နှစ်ရက်ဆက်တိုက်ခိုက်

▪️စစ်ကောင်စီတပ်သား ၃၀ခန့်ထိခိုက်သေဆုံးဟု C&T SHWEBO

စစ်ကိုင်းတိုင်း၊ ရွှေဘိုမြို့နယ်တွင် ကျေးရွာများ မီးရှို့ဖျက်စီးပြီးနောက် စစ်ကြောင်းထိုးနေသော စစ်အုပ်စုကို နှစ်ရက်ဆက်တိုက်ခိုက်ရာ စစ်ကောင်စီတပ်သား ၃၀ခန့်ထိခိုက်သေဆုံးကြောင်း C&T SHWEBO က ယနေ့(မေ ၄ ရက်)တွင် ထုတ်ပြန်သည်။

အကြမ်းဖက်စစ်ကောင်စီ စစ်ကြောင်းကို ဇီးဖြူကုန်းရွာနှင့်ဆိပ်ခွန်ကျေးရွာကြားတွင် မဟာမိတ်တပ်ပေါင်းစု SNAKE EYES PDF၊ C&T SHWEBO၊ ဒေါင်းမာန်၊ ဗိုလ်ကျားရိုင်း ပ က ဖ၊ Alpha 7 ၊မဟူရာဇီးကွက်(ဒီပဲယင်း) ၊ ပြုံးရွှင်(ဒီပဲယင်း)၊အရာတော်ရွှေဂျိုးဖြူ၊People Defense Force Shwebo နှင့် B F D F နဂါးတပ်စုတို့မှ ပူးပေါင်းတိုက်ခိုက်ခဲ့သည်ဟု ဆိုသည်။

မေ ၂ ရက် နှင့် ၃ ရက်အတွင်း လိုက်လံတိုက်ခိုက်မှုတွင် စစ်ကောင်စီဘက်မှ ၃၀ခန့် ထိခိုက်သေဆုံးမှုတွင် ဗိုလ်ကြီးအဆင့်တစ်ဦး ဒဏ်ရာအပြင်းအထန်ရရှိခဲ့သည်ဟု C&T SHWEBOက အသိပေးသည်။

Public Service Announcement

သို့သော် အကြမ်းဖက်စစ်တပ်၏ လက်နက်ကြီးထိမှန်၍ ပြည်သူ (၃)ဦး သေဆုံးပြီး (၆)ဦး ဒဏ် ရာရရှိခဲ့သည်။

“သေသွားတာ​က ဆိပ်ခွန်ရွာခံတွေ။အိမ်ပေါ်ကို လက်နက်ကြီးကျတာ”ဟု ရွှေဘိုဒေသခံပြည်သူတစ်ဦးကပြောသည်။

ထို့အပြင် တိုက်ပွဲအတွင်း ဒေသခံပြည်သူများကို စစ်ကောင်စီတပ်က လူသားဒိုင်းကာအဖြစ် အသုံးပြုထားသည့်အတွက် တပ်ပေါင်းစုမဟာမိတ်အဖွဲ့အစည်းများမှ အများပြည်သူကို ရှေးရှု၍ ပြန်လည်ဆုတ်ခွာလာခဲ့ကြောင်း ထုတ်ပြန်ချက်၌ ဖော်ပြသည်။

အကြမ်းဖက်စစ်တပ်သည် အင်အား ၂၀၀ခန့်ဖြင့် ရွှေဘိုမြို့နယ်အတွင်း ဧပြီ နောက်ဆုံးပတ်ကစ၍ စစ်ကြောင်းထိုးကာ ရွာစဥ် မီးရှို့ပြီး ဒေသခံပြည်သူ ၁၀ ဦးထက်မနည်းသတ်ဖြတ်ခဲ့ကြောင်း ဒေသတွင်း သတင်းရင်းမြစ်များက ဆိုသည်။