အာဏာသိမ်းစစ်ခေါင်းဆောင် မင်းအောင်လှိုင်ဖိတ်ကြားသော ငြိမ်းချမ်းရေးဆွေးနွေးပွဲသည် ကန့်သတ်ဖိတ်ကြားသောပုံစံဖြစ်နေပြီး သက်ဆိုင်သူအားလုံးမပါဝင်သည့်အခင်းအကျင်းဖြစ်နေသည့်အတွက် ကရင်အမျိုးသားအစည်းအရုံး(KNU) အနေဖြင့်တက်ရောက်နိုင်မည်မဟုတ်ကြောင်း ယနေ့ညတွင်ထုတ်ပြန်လိုက်သည်။
ထိုကြောင့် အာဏာသိမ်းစစ်ခေါင်ဆောင်ဖိတ်ခေါ်သောဆွေးနွေးပွဲကို မတက်ရောက်ကြောင်းတရားဝင်ထုတ်ပြန်သော တိုင်းရင်းသားလက်နက်ကိုင်အဖွဲ့ ၅ဖွဲ့ရှိလာသည်။ KIA ၊ KNPP ၊ CNF ၊ ABSDF နှင့်KNU တို့ဖြစ်သည်။စစ်တပ်ကအာဏာသိမ်းပြီးနောက်ပိုင်း အဆိုပါအဖွဲ့များမှာ ပြည်သူနှင့်ပူးပေါင်း၍ စစ်ကောင်စီတပ်ကို အဓိကတိုက်ခိုက်နေသောအဖွဲ့များလည်းဖြစ်သည်။
“စကစဟာ အကြမ်းဖက် အာဏာသိမ်းခဲ့တာကြောင့် တရားဝင်တဲ့ အဖွဲ့အစည်း မဖြစ်တာနဲ့အညီ မည်သည့် တရားဝင်နိုင်ငံရေးဆွေးနွေးပွဲကိုမှ ခေါ်ပိုင်ခွင့်မရှိသလိုဒီလို နိုင်ငံရေးဆွေးနွေးပွဲတွေနဲ့ ထိုက်တန်တဲ့လူတွေမဟုတ်ပါကြောင်း သိစေအပ်ပါတယ်” ဟု KNU ပြောရေးဆိုခွင့်ရှိသူပဒိုစောတောနီးက ယနေ့ ညနေပိုင်းတွင် People’s Spring သို့ပြောကြားထားသည်။
မင်းအောင်လှိုင်က တိုင်းရင်းသားလက်နက်ကိုင်အဖွဲ့များကို ငြိမ်းချမ်းရေးဆွေးနွေးရန်ဆိုကာ ဖိတ်ကြားထားသောအချိန်တွင်ပင် အကြမ်းဖက်စစ်တပ်က စစ်ကိုင်းတိုင်းရှိကျေးရွာများကို အကြမ်းဖက်စီးနင်းမီးရှို့ဖျက်ဆီးမှုများ အရှိန်မြှင့်ပြုလုပ်နေသည်။