တနင်္သာရီတိုင်း၊ ပုလောမြို့နယ်၊ ပဝတ်ကုန်းရွာအနီး စစ်ကောင်စီယာဉ်တန်းကို နှစ်ကြိမ်မိုင်းဆွဲတိုက်ခိုက်ခဲ့ရာ စစ်ကောင်စီတပ်သား ၄၀ကျော်သေဆုံးဒဏ်ရာရရှိကြောင်း PDF(ပုလော)မှ တာဝန်ခံက ပြောသည်။
မေလ၁၂ ရက် ည၁၂ နာရီတွင် မြိတ်မြိုမှပုလောမြို့လာသည့် စစ်ကောင်စီတပ်၏ ၁၁ စီးပါယာဥ်တန်းကို ပုလောမြို့နယ်ရှိ မဟာမိတ်တပ်ပေါင်းစုကပဝတ်ကုန်းရွာအနီးတွင်မိုင်းခွဲတိုက်ခိုက်ခဲ့သည်။ ထိုနောက် ယနေ့ (မေ ၁၃) နံနက်၄နာရီခွဲတွင် ထားဝယ်မှာမှ လာသည့် စစ်ကား ၁၆ စီးကိုလည်းထပ်မံ မိုင်းဆွဲတိုက်ခိုက်ခဲ့ကြောင်း ပုလောPDFကထုတ်ပြန်သည်။
တိုက်ခိုက်မှုနှစ်ကြိမ်လုံးအတွက် စုစုပေါင်း မိုင်း ၇လုံးအသုံးပြုခဲ့ပြီး စစ်ကောင်စီတပ်ဘက်မှာ အနည်းဆုံး လူ ၄၀ကျော် ဒဏ်ရာရရှိခဲ့သည်ဟုထုတ်ပြန်ချက်တွင်ဖော်ပြထားသည်။ ၄၀ဦးတွင် သေဆုံးသူ အယောက် ၂၀ခန့်ရှိနိုင်ပြီး စာရင်းအတည်ပြုရန် ကြိုးစားနေဆဲဟု PDF(ပုလော) တာဝန်ခံကပြောသည်။
“သေတဲ့သူကော ဒဏ်ရာရသူကော၊ သေသူအတိအကျ မသိရသေးလို့။သွေးအိုင်တွေ လမ်းမကြီးတလျှောက်ကျနေတာဘဲ့။ သူတို့ လိုက်ဖုံးနေတယ်” ဟု ၎င်းကဆက်ပြောသည်။
Public Service Announcement
ထိုခိုက်သေဆုံးမှုမှာ မြိတ်မှထွက်လာသော စစ်ကောင်စီယာဥ်တန်းမှ ဖြစ်ပြီး ထားဝယ်မှ စစ်ကူလာသောယာဥ်တန်းမှ ထိ့ခိုက်မှုနည်းကြောင်းလည်းသိရသည်။
“ မြိတ်က ၆ စီး ထိတယ်။ မိုင်းဆွဲပြီး ကျနော်တို့ဘက်က ပြန်ဆုတ်တယ်။ သူတို့ဘက်က လက်နက်ကြိး လက်နက်ငယ်နဲ့ တရစပ် ပြန်လည်ပစ်ခတ်ပါတယ်။ ထားဝယ်ဘက်က ထိခိုက်မူ သိပ်မရှိဘူး ဗျ။ ကားထိုးရပ်တော့ ထိုးရပ်သေး။ ထိခိုက်မူနည်းတယ်”ဟုPDF(ပုလော) မှ တာဝန်ရှိသူတစ်ဦးက လူထုနွေဦးကိုပြောသည်။
မိုင်းခွဲတိုက်ခိုက်ခဲ့သော်လည်း လက်နက်အင်အား မမျှခြင်းကြောင့် ပစ်ခတ်တိုက်ခိုက်မှုမလုပ်ခဲ့ဘဲ ပြန်လည်ဆုတ်ခွာခဲ့သည်ဟုလည်း၎င်းကရှင်းပြသည်။
စစ်ကောင်စီတပ်မိုင်းဆွဲတိုက်ခိုက်ခံရပြီးနောက် ယနေ့တွင် ထားဝယ်မြို့အထွက်၌ စစ်ကောင်စီတပ်က အစစ်အဆေးကြမ်းနေကြောင်းလည်းဒေသခံတစ်ဦးကပြောသည်။
ပုလောမြို့နယ်သည် စစ်ကောင်စီတပ်ကို ဒေသခံ PDFများက မကြာခဏတိုက်ခိုက်နေပြီး တနင်္သာရီတိုင်းအတွင်း စစ်ရေးတင်းမာနေခြင်းကြောင့် ပြည်သူများခရီးသွားလာပါကအထူးသတိထားရတ်ဒေသခံကာကွယ်ရေးတပ်များက သတိပေးထားသည်။
“ပြည်သူတို့ရဲ့ထောက်ပံ့မှု ကူညီမှုနှင့်အတူ ကျနော်တို့ အစွမ်းကုန်ကြိုးပြီး တိုက်ခိုက်နေပါတယ်။ စစ်အာဏာရှင်စနစ် ပြုတ်ကျသည်အထိ တိုက်ခိုက်သွားပါ့မယ်”ဟု ပုလော PDF မှ ရဲဘော်တစ်ဦးကပြောသည်။
