ဖောင်းပြင်မြို့နယ်တွင် စစ်ကောင်စီနှင့် ပျူစောထီးတပ်စွဲထားသည့်နေရာကို PDF များတိုက်ခိုက်

▪️စစ်ကောင်စီတပ်မှ သေဆုံးထိခိုက်များပြီး PDF တစ်ဦးကျဆုံး

စစ်ကိုင်းတိုင်း ဖောင်းပြင်မြိုနယ် ရွှေညောင်ပင်အုပ်စုအတွင်းရှိ ရွှေပုဂံကျောင်းတိုက်၌ တပ်စွဲထားသည့် စစ်ကောင်စီတပ်နှင့် ပျူစောထီးများကို ယမန်နေ့က တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက် များပြားခဲ့ကြောင်း ဖောင်းပြင်ပြည်သူ့ကာကွယ်ရေးတပ်(PDF)က ထုတ်ပြန်သည်။

အဆိုပါ ရွှေပုဂံကျောင်းတိုက်၌ စစ်ကောင်စီနှင့် ပျူစောထီး အင်အား(၁၀၀)ကျော် တပ်စွဲနေသည်မှာ ကြာပြီဖြစ်ကြောင်း၊ ဇွန်လ ၄ရက် မွန်းလွဲ ၃နာရီခွဲတွင် အင်အား ၈၀ ခန့်ရှိ ဖောင်းပြင် PDFနှင့် ပြည်သူ့ကာကွယ်ရေးအဖွဲ့(ပကဖ) ပူးပေါင်းပြီး သွားရောက်တိုက်ခိုက်ခဲ့ကြောင်း ဖော်ပြထားသည်။

ထိုသို့ တိုက်ခိုက်ရာတွင် စစ်ကူမလာနိုင်စေရေး ဖောင်းပြင်မြို့မရဲစခန်းကိုပါ ပစ်ခတ်ခဲ့သော်လည်း ဖောင်းပြင်အခြေစိုက် ခြေမြန်တပ်ရင်းများမှ စစ်ကူများ ငှက်ပျောတော ရွာဘက်မှ ဝင်ရောက်တိုက်ခိုက်လာ၍ ရန်သူအင်အား ပိုများလာခဲ့ကြောင်း၊ ထို့ကြောင့် စခန်းမသိမ်းနိုင်ဘဲ ပြန်လည်ဆုတ်ခွာခဲ့ရကြောင်း ထုတ်ပြန်သည်။

Public Service Announcement

“PDF နဲ့ ပကဖ တွေဘက်က(၁)ယောက်ကျဆုံးပြီး(၂)ယောက်မစိုးရိမ်ရဒဏ်ရာရပါတယ်။ စကစ နဲ့ ပျူဗာလတို့တွေဘက်က (၃၀)ကျော်ကျဆုံးပြီးအများအပြား ဒဏ်ရာရပါတယ်။ ဒီမနက်စစ်သား ၁၅ ယောက် ကား၂ စီးနဲ့လာပြီးအလောင်းကောက်သွားတယ်။ ဘယ်မှာမြေမြှုပ်မယ်မသိရပါ” ဟု ဖောင်းပြင် PDFက ထုတ်ပြန် သည်။

ထိခိုက်ကျဆုံးများနေသည် စစ်ကောင်စီတပ်သည် ၎င်းတို့၏ ထိခိုက်ကျဆုံး အခြေအနေကို အမြဲသတင်းထိန်ဝှက်ထားပြီး ကျဆုံးမှုမရှိလေဟန် တပ်တွင်း၌ ဝါဒဖြန့်လေ့ရှိကြောင်း ဖော်ပြထားသည်။

မေလ ၂၆ရက်ကလည်း ဖောင်းပြင် PDF စခန်းသို့ စစ်ကောင်စီတပ်များ ဝင်ရောက်စီးနင်းစဉ် တိုက်မိုင်းထိပြီး စစ်ကောင်စီဘက်မှ ၁၀ဦးသေဆုံးခဲ့သည်ကို ၎င်းတို့ဘက်မှ သတင်းထွက်လာ၍ သိရကြောင်း၊ ဧပြီ ၂၇ရက် မြင်သာအရှေ့ရေတွင်းကုန်းပွိုင့် တိုက်ပွဲ၌လည်း စစ်ကောင်စီတပ်မှ အရာရှိသေဆုံးခဲ့သည်ကို ၎င်းတို့ဘက်မှ သတင်းထွက်လာ၍ သိရကြောင်း ထုတ်ပြန်သည်။