သရက်ချောင်းမြို့နယ်တိုက်ပွဲ စစ်ကောင်စီတပ် ၉ဦး​သေ

တနင်္သာရီတိုင်း၊ သရက်ချောင်းမြို့နယ်တွင် စစ်ကောင်စီတပ်နှင့် ဒေသခံကာကွယ်ရေးတပ်တို့ကြားတိုက်ပွဲဖြစ်ပွားပြီး စစ်ကောင်စီတပ်သား ၉ဦးသေဆုံးခဲ့သည်ဟု ဒေသခံကာကွယ်ရေးတပ်များနှင့် နီးစပ်သူများက ​ပြောသည်။

သရက်ချောင်းမြို့နယ်၊ စော်ဖျားရွာတွင် တပ်စွဲထားသည့် စစ်ကောင်စီတပ်ကို ဒေသခံပြည်သူ့ကာကွယ်ရေးတပ်များက ယနေ့(ဇွန် ၁၃ ရက်) နေ့လယ် ၁၂နာရီခန့်တွင် တိုက်ခိုက်ခဲ့ခြင်းဖြစ်ပြီး စစ်ကောင်စီတပ်မှ လက်နှက်ကြီးငယ်များဖြင့် ပြန်လည်ခုခံခဲ့သည်ဟု ဒေသခံကာကွယ်ရေးတပ်များနှင့်နီးစပ်သူများက ဆိုသည်။

ထို့အပြင် စစ်ကောင်စီတပ်၏ ယာဥ်များကို နှစ်ကြိမ်မိုင်းဆွဲတိုက်ခိုက်ခဲ့သည်။ စစ်ကောင်စီတပ်မှ တပ်သား ၉ဦးထက်မနည်း သေဆုံးပြီး လက်နက် ၁လက် သိမ်းဆည်းရမိခဲ့သည်။

အဆိုပါ တိုက်ပွဲကို နေ့လယ် ၁၂ နာရီမှ ၁နာရီအထိ ၁နာရီကြာတိုက်ပွဲဖြစ်ပွားခဲ့ပြီးတိုက်ပွဲအတွင်း ပြည်သူ့ကာကွယ်ရေးတပ်ဖွဲ့ဘက်မှ တစ်ဦးမစိုးရိမ်ရ ဒဏ်ရာရရှိခဲ့သည်။ စစ်ကောင်စီတပ်က ​နေအိမ်နှစ်လုံးကို မီးရှို့ခဲ့သည်ဟုလည်း ဒေသခံများက ပြောသည်။

Public Service Announcement

“အခုစော်ဖျားဘက်ကို မြေတင်ကားတွေနဲ့ ပျူစောထီးတွေကော စစ်ကောင်စီတပ်က အင်အားဖြည့်နေတယ်။ ”ဟု ဒေသခံတစ်ဦးက ပြောသည်။

လက်ရှိအချိန်တွင် သရက်ချောင်းမြို့နယ်အတွင်း စစ်ကောင်စီတပ်နှင့် ဒေသခံကာကွယ်ရေးတပ်တို့ကြား စစ်ရေးအလွန်တင်းမာနေပြီး ပြည်သူများအနေဖြင့် စစ်ကောင်စီတပ်များနှင့် ဝေးဝေးနေကြရန်လည်း ဒေသခံကာကွယ်ရေးတပ်များက သတိပေးထားသည်။