တောင်ငူမြို့ အမြန်လမ်းအနောက်ဘက် ရိုးမတောင်ခြေသို့ စစ်ကြောင်းထိုးလာသော အကြမ်းဖက်စစ်ကောင်စီတပ်ကို တစ်ရက်ထဲ လေးကြိမ်ပစ်ခတ်တိုက်ခိုက်ခဲ့ကြောင်း တောင်ငူခရိုင် PDF တပ်ရင်း (၃၅၀၁)က ယနေ့(ဇူလိုင် ၃၁)အသိပေးထုတ်ပြန်သည်။
ဇူလိုင် ၂၆ ရက်နေ့ကတည်းက စစ်ကြောင်းထိုးလာသော အင်အား ၈၀ ခန့်ပါစစ်ကောင်စီတပ်စစ်ကြောင်းကိုတပ်ရင်း(၃၅၀၁)တပ်ဖွဲ့ဝင်များမှ ဇူလိုင် ၂၈ ရက်နေ့ နေ့လယ် ၂ နာရီကျော်မှ ညနေ ၆ နာရီခွဲအထိ လေးကြိမ်ပစ်ခတ်တိုက်ခိုက်ခဲ့ကြောင်း ဖော်ပြသည်။
စစ်ကောင်စီတပ်အား တိုက်ခိုက်ရာတွင် တော်လှန်ရေးတပ်ဖွဲ့ဝင်များမှ ကျည်ကွယ်၊ မျက်ကွယ်များ၌ အသင့်စောင်းဆိုင်းပြီးချုံခိုတိုက်ခိုက်ခဲ့ရာစစ်ကောင်စီတပ်ဘက်မှလေးဦးသေဆုံးကာအရာရှိအပါအဝင်၁၀ဦးထိခိုက်ဒဏ်ရာရသွားကြောင်း ထုတ်ပြန်သည်။
“မိမိတို့တပ်ဖွဲ့ဝင်များသည် ကျည်ကွယ်မျက်ကွယ်နေရာများတွင် အသင့်ခြုံခိုစောင့်ဆိုင်းကာ တပြိုင်နက်တည်း ဝိုင်းဝန်းပစ်ခတ်မှုကြောင့် သေဆုံးသူ (၄) ဦးအပြင် ဒဏ်ရာရသူ (၁၀) ဦးခန့် (အရာရှိတစ်ဦးပါ)ဖြင့် အရေးနိမ့်ကာ ရန်သူ့စစ်ကြောင်းမှာ ကစင့်ကလျား ပြန်လည်ဆုတ်ခွာသွားခဲ့ပါသည်”ဟု ဆိုသည်။
Public Service Announcement
အဆိုပါတိုက်ခိုက်မှုအတွင်း ထူးခြားချက်နှစ်ခုတွေ့ရပြီး ယင်းတို့မှ စစ်ကောင်စီတပ်ဘက်မှ အမျိုးသမီးအသံများကြားရခြင်း၊ တိုက်ပွဲဖြစ်နေစဥ်ဘလူးတူးဘောက်စ်ဖြင့်တရားများဖွင့်လှစ်ထားခြင်းတို့ဖြစ်ကြောင်း ဖော်ပြသည်။
“၎င်းအချက်ကိုကြည့်ခြင်းဖြင့် ရန်သူမှာ ရုပ်ရော စိတ်ပါ ပျက်ယွင်းနေသည့် အနေအထားဖြစ်ပါသည်”ဟု တောင် ငူခရိုင် PDF တပ်ရင်း (၃၅၀၁)မှ သုံးသပ်ထားသည်။
ထို့အပြင် တိုက်ပွဲဖြစ်ပွားပြီးနောက် ဇူလိုင် ၂၉ တွင် နယ်မြေရှင်းလင်းရေးလုပ်ဆောင်ရာ ရန်သူ၏ ဦးထုပ်၊ စစ်တဘက်၊ ဆိုလာပြား၊ ဘလူးတုဘောက်စ်၊ သံကြိုး၊ ဒန်အိုး၊ စစ်စွတ်ကျယ်၊ သွေးစွန်းနေသော ပတ်တီးစများ၊ တောအရက်ပုံးတစ်ပုံး အပြင် ၄၀ မမ ဗုံးသီး ၂ လုံး လက်နက်ကြီး/ငယ် ဖြုတ်၊တပ် ရာတွင် အသုံးပြုသည်ဟု ယူဆရသော ဂွင်း/ဂွ များကို တွေ့ရှိရသည်ဟု ဖော်ပြသည်။
