သာကေတမြို့နယ်ရှိ ဦးပိုင်ဝန်းအတွင်းမှ စစ်တပ်ဆီကားများကို ချိန်ကိုက်မိုင်းဖြင့်ဖောက်ခွဲ၊ အပြန်အလှန်ပစ်ခတ်မှုဖြစ်

သာကေတမြို့နယ်ရှိ စစ်ကောင်စီထောက်တိုင် ဦးပိုင်ဝန်းအတွင်းရပ်ထားသော စစ်တပ်ပိုင်ဆီကားများအနီး ချိန်ကိုက်မိုင်းဖြင့် ဖောက်ခွဲတိုက်ခိုက်ခဲ့ကြောင်း Soul Takers- Yangon Underground Force က ယနေ့(သြဂုတ် ၁၀)ထုတ်ပြန်သည်။

ယနေ့ ည ၇ နာရီ ၂၁ တွင် စစ်ကောင်စီပိုင်ဆိုင်သော ဆီကားများရပ်နားရာ သာကေတ (၃၈)ကျောင်းရှေ့ ဦးပိုင်ဟိုတယ်ဝန်းအား ချိန်ကိုက်ဗုံးအကြီးဖြင့် ဖောက်ခွဲရေးလုပ်ဆောင်ခဲ့ပြီး အရပ်ဝတ်ကင်းပုန်းများ၊ စစ်ကောင်စီတပ်သားများ အင်အားသာလွန် ရှိနေသောကြောင့် ထိတွေ့ပစ်ခတ်မှုများ အပြန်အလှန်ဖြစ်ပွားကာ အရေးပေါ်အခြေအနေအရ ဆုတ်ခွာခဲ့ရကြောင်း ဖော်ပြသည်။

ပြန်လည်ဆုတ်ခွာရာ လမ်းကြောင်းတွင် လက်ပစ်မိုင်းအသုံးပြုခဲ့ရခြင်း၊ ခုခံတိုက်ခိုက်ခံရခြင်းများ ရှိသည့်အတွက် Soul Takers ရဲဘော်များ အထိအခိုက်မရှိ ဆုတ်ခွာနိုင်ခဲ့သော်လည်း ရန်သူအထိအခိုက်အား တိကျစွာ အခြေအနေအရ တိကျစွာတင်ပြနိုင်ခြင်း မရှိသေးဟု အသိပေးသည်။

“စုံစမ်း စိစစ်နေသည့်အတွက် ရန်သူအထိအခိုက် သိရှိရပါက အချိန်နှင့်တပြေးညီ တင်ပြနိုင်ရန်လည်း ကြိုးစားဆောင်ရွက်လျက် ရှိပါသည်”ဟု ထပ်မံအသိပေးသည်။

Public Service Announcement

လက်ရှိတွင် ရဲဘော်များအားလုံး လုံခြုံသည့်နေရာသို့ ရောက်ရှိပြီဖြစ်ပြီး UG အဖွဲ့မှ စစ်ကောင်စီ၏ပင်မ​​ထောက်တိုင်များကိုဆက်လက်တိုက်ခိုက်တိုက်ပွဲဝင်သွားမည်ဖြစ်ကြောင်းသတင်းထုတ်ပြန်ထားသည်။

ယနေ့ (သြဂုတ် ၁၀ ရက်)နေ့လယ်ပိုင်းကလည်း သာကေတ (၁၀)တောင်ရပ်ကွက်၊ အဝိုင်းအနီးတွင် ကယ်ရီသမားအယောင်ဆောင်အသွင်ယူထားသောစစ်ကောင်စီလက်အောက်ခံ ရဲတပ်ကြပ်တစ်ဦးကို ရန်ကုန် UG အဖွဲ့တစ်ဖွဲ့က ပစ်ခတ်သုတ်သင်ခဲ့သည်။