မြန်မာ့အရေးအပေါ် အာဆီယံ၏ဖြေရှင်းဆောင်ရွက်ပုံကို အားရကျေနပ်ခြင်းမရှိကြောင်း မလေးရှားနိုင်ငံခြားရေးဝန်ကြီးက ယနေ့ပြောသည်။
အာဆီယံသည် အစည်းအဝေးများမှတဆင့် မြန်မာနိုင်ငံ၏ ပကတိဖြစ်ပွားနေသည့်အခြေအနေကို ဆက်လက်ဖြေရှင်းနိုင်မည်မဟုတ်ဘဲ အစည်းအဝေးများတွင် ပြည်သူများအသတ်ခံရခြင်း စသည့် အခြေအနေများကို အရေးပေါ်ကိုင်တွယ်ဖြေရှင်းသင့်ကြောင်း ဝန်ကြီး Saifuddin Abdullah က ၎င်း၏လူမှုကွန်ရက်၌ ရေးသားသည်။
မြန်မာ့အရေးနှင့်ပတ်သက်၍ မလေးရှားနိုင်ငံခြားရေးဝန်ကြီးသည် အာဆီယံအတွင်းရေးမှူးချုပ်ထံ စာရေးသားနေပြီး ယင်းစာထဲတွင် မြန်မာနိုင်ငံ၏ ပကတိအခြေအနေကို ခိုင်မာယုံကြည်သည့်ရင်းမြစ်များမှတဆင့် အာဆီယံနိုင်ငံ ခြားရေးဝန်ကြီးများကို ပုံမှန်အစီရင်ခံရန်၊ လူသားချင်းစာနာမှုအကူအညီဖြန့်ဖြူးရေးတွင် ပိုမို ကောင်းမွန်သည့်နည်းလမ်းကို စဉ်းစားသုံးသပ်ရန် အချက်များကို ထည့်သွင်းထားကြောင်း ပြောသည်။
ပကတိမြန်မာ့အခြေအနေသည် တိုက်ပွဲများ၊ ပြည်သူများအသတ်ခံရခြင်း၊ ဖမ်းဆီးခံရခြင်း သို့မဟုတ် ထွက်ပြေးတိမ်းရှောင်ရခြင်း စသည်ဖြင့် အလွန်ဆိုးရွားနေကြောင်း Saifuddin Abdullah က ရေးသားသည်။
Public Service Announcement
အကြမ်းဖက်စစ်ခေါင်းဆောင် မင်းအောင်လှိုင်သည် မကြာသေးမီက ကုလသမဂ္ဂအထူးကိုယ်စားလှယ် နှင့်တွေ့ဆုံမှုတွင် နိုင်ငံသည် တည်ငြိမ်မှုရှိနေကြောင်း လိမ်လည်ပြောဆိုခဲ့သည်။
ထို့အပြင် စစ်ကောင်စီက ဖွဲ့စည်းထားသော လူသားချင်းစာနာမှုအကူအညီပေးရေးလုပ်ငန်းအဖွဲ့ သည် စီစဉ်ထားသကဲ့သို့ တိုးတက်မှုမရှိကြောင်း မလေးရှားနိုင်ငံခြားရေးဝန်ကြီးက ပြောသည်။
သို့သော် စစ်ကောင်စီနှင့်ပတ်သက်ခြင်းမရှိသော ဒေသအခြေပြုအဖွဲ့အစည်းများအပါအဝင် အခြားအဖွဲ့များသည် COVID-19 ကာကွယ်ဆေးထိုးနှံခြင်းနှင့် လူသားချင်းစာနာမှုအကူအညီများကို ကောင်းမွန်စွာလုပ်ကိုင်နိုင်ကြောင်း Saifuddin Abdullah က ဆိုသည်။
မလေးရှားနိုင်ငံခြားရေးဝန်ကြီး Saifuddin Abdullah သည် အာဆီယံအနေဖြင့် အမျိုးသားညီညွတ်ရေးအစိုးရ NUG ၊ အမျိုးသားညီညွတ်ရေးအတိုင်ပင်ခံကောင်စီ NUCC တို့နှင့် တရားဝင်ထိ တွေ့ဆက်ဆံမှုများလုပ်ဆောင်ရန် တိုက်တွန်းထားသည်။
