စစ်ကောင်စီတပ်က စိန်ပြောင်းဖြင့်ပစ်၍ ဝက်လက်နယ်ရှိ နေအိမ်အချို့ မီးလောင်ပျက်စီး

ဒေသခံပြည်သူတစ်ဦး ထိခိုက်ဒဏ်ရာရ

စစ်ကိုင်းတိုင်း၊ ဝက်လက်မြို့နယ်တွင် စစ်ကောင် စီတပ်က ဖွတ်လိုင်းကျေးရွာကို (၆၀)မမ စိန်ပြောင်းဖြင့် ပစ်ခတ်ခဲ့ရာ နေအိမ်အချို့ မီးလောင်ပျက် စီးခဲ့ပြီး ဒေသခံပြည်သူတစ်ဦး ထိခိုက်ဒဏ်ရာရရှိခဲ့ကြောင်း ဒေသတွင်း သတင်းရင်းမြစ်များက ပြောသည်။

ယမန်နေ့(စက်တင်ဘာ ၉ ရက်) မွန်းလွဲ ၂ နာရီခွဲခန့်က ရွှေဘိုမြို့နယ် ချောင်းဆုံကျေးရွာမှ အင်အား ၄၀ခန့်ပါ စစ်ကောင်စီတပ်သည် ဝက်လက်မြို့နယ် ရင်းမကန်ကျေးရွာသို့ ရောက်ရှိလာခဲ့သည်။

ထို့နောက် ညနေ ၅ နာရီ ၄၅ မိနစ်ခန့်တွင် စစ်ကောင်စီတပ်သည် ရင်းမကန်ကျေးရွာမှ အနောက်ဘက် ဖွတ်လိုင်း ကျေးရွာသို့ (၆၀)မမ စိန်ပြောင်းဖြင့် ပစ်ခတ်ရာနေအိမ်တစ်လုံးပေါ် ကျရောက်ပေါက် ကွဲ၍ မီးစွဲပြီး ကျေးရွာပြည်သူနေအိမ်များ မီးကူးစက် လောင်ကျွမ်းခဲ့ကြောင်း ဒေသခံများက ပြောသည်။

အဆိုပါဖြစ်စဥ်မတိုင်ခင် ချောင်းဆုံကျေးရွာကို ရောက်ရှိနေသော စစ်ကောင်စီတပ်သား အင်အား ၄၀ ခန့်ကို ရွှေဘိုခရိုင် တပ်ရင်း(၅) တပ်ခွဲ – ၁က ခြုံခိုတိုက်ခိုက်ရန် ပြင်ဆင်နေစဉ် နမခ မှ တက်လာသော Mi 35 တစ်စီးသည် ညနေ ၄ နာရီ ဝန်းကျင်ခန့်တွင် ရွှေဘိုမြို့နယ် ပေါက်တုံကျေးရွာနှင့် ဝက်လက်မြို့နယ် ရင်းမကန် ကျေးရွာ ၊ ဖွတ်လိုင်းကျေးရွာတို့၌ ပစ်ခတ်ခဲ့သဖြင့် အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း ဒေသတွင်း PDFများက ပြောသည်။

Public Service Announcement

သို့သော် စစ်ကောင်စီတပ်၏ ပစ်ခတ်မှုကြောင့် ဖွတ်လိုင်းကျေးရွာရှိ ဒေသခံပြည်သူတစ်ဦး ခြေထောက်ထိမှန် (မစိုးရိမ်ရ) ဒဏ်ရာရရှိခဲ့ကြောင်း ဒေသတွင်း ပြည်သူ့ကာကွယ်ရေးအဖွဲ့များက အသိပေးသည်။

ည၇နာရီ ၁၀မိနစ်ခန့်တွင် ချောင်းဆုံကျေးရွာမှ စစ်ကောင်စီတပ်များသည် ရွှေဘိုဘက်သို့ အိမ်စီးကား နှစ်စီးဖြင့် ပြန်ထွက်လာခဲ့သည်။ ထိုကားနှစ်စီးအား ချောင်းဆုံနှင့် ပေါက်တုံကျေးရွာအရောက်တွင် ရွှေဘိုခရိုင် တပ်ရင်း (၅)၊ တပ်ခွဲ -၁ မိုင်းတပ်စိတ်နှင့် ဒေသခံကာကွယ်ရေး(ပကဖ) များ ပူးပေါင်းကာ ပဒေသာ မိုင်းဆွဲတိုက်ခိုက်ခဲ့သဖြင့် ယာဉ်နှစ်စီး ထိမှန်ခဲ့ကြောင်း ရွှေဘိုမြို့နယ်သတင်းအမှန်ပြန်ကြားရေး က အသိပေးထားသည်။