ရခိုင်ပြည်နယ် မောင်တောမြို့နယ်ရှိ စစ်ကောင်စီတပ် ခမရ(၃၅၂)တပ်ရင်း စခန်းကုန်းကို စက်တင်ဘာ ၁၀ရက်မနက်က တိုက်ခိုက်သိမ်းပိုက်ရရှိခဲ့ရာ သိမ်းပိုက်ရရှိသောလက်နက်ခဲယမ်းများရုပ်သံမှတ်တမ်းကိုရက္ခိုင့်တပ်တော်(AA)က ယနေ့သတင်းထုတ်ပြန်လိုက်သည်။
စခန်းကုန်းသိမ်းပိုက်စဥ်သိမ်းဆည်းရမိသောလက်နက်များတွင် လက်နက်ကြီးလက်နက်ငယ်မျိုးစုံ( ၂၀)ဝန်းကျင် ၊လက်နက်ကြီးကျည်မျိုးစုံ ၊RPG ကျည် ၊ဗုံသီးများ ၊မိုင်းများ ၊လက်နက်ငယ်ကျည် ဆံပေါင်းများနှင့်စစ်သုံးပစ္စည်းအများအပြားသိမ်းဆည်းရမိခဲ့သည်ကို ရုပ်သံဖိုင်နှင့်သတင်းဓါတ်ပုံများတွင်တွေ့ရသည်။
လောင်းဒို(မြို့)ရွာ (ခ) ဂြိတ်ချောင်းကျေးရွာ အနီးရှိ စစ်ကောင်စီ၏ ခမရ(၃၅၂) တပ်ရင်း စခန်းကုန်းကို AAက ထိုးစစ်ဆင် တိုက်ခိုက်ခဲ့ရာ တစ်နရာရီကျော်သာ တိုက်ခိုက်ခဲ့ရပြီး စခန်းကုန်းအား သိမ်းပိုက်နိုင်ခဲ့ ပြီးစစ်သားအများအပြားသေဆုံးဒဏ်ရာရရှိခဲ့သည်။
တိုက်ပွဲအတွင်း စစ်ကောင်စီတပ်ဖက်မှ အများအပြားသေဆုံးပြီး လက်နက်ခဲယမ်းအများအပြား သိမ်းဆည်းရမိကာ စစ်ကောင်စီတပ်သားအချို့ကိုလည်း သုံ့ပန်းအဖြစ် ဖမ်းဆီးရမိခဲ့သည်ဟု AAက ထုတ်ပြန်သည်။
Public Service Announcement
ယမန်နေ့ တိုက်ပွဲဖြစ်ပွားရာ စခန်းကုန်းအနီးတဝိုက်သို့ စစ်ကောင်စီတပ်က ရဟတ်ယာဉ် ၊ တိုက်လေယာဉ်များဖြင့် တစ်နေကုန် လာရောက်တိုက်ခိုက်ခဲ့ကြောင်း လည်းဖော်ပြသည်။
AA အနေဖြင့် ဩဂုတ် ၃၁ရက်က မြန်မာ-ဘင်္ဂလားဒေ့ရှ် နယ်စပ် မိုင်တိုင်အမှတ် (၄၀) အနီးရှိ စစ်ကောင်စီတပ်၏ တပ်စခန်းတစ်ခု ကို တိုက်ခိုက်သိမ်းပိုက်ခဲ့ပြီးနောက် စစ်ကောင်စီ တပ်စခန်းတစ်ခုကို ထပ်မံ သိမ်းပိုက်နိုင်ခဲ့ခြင်းဖြစ်သည်။
စစ်ကောင်စီတပ်သည် မိုင်တိုင် ၄၀ အနီးရှိ တပ်စခန်းအားပြန်လည်ရယူရန်ကြိုးစားနေပြီး စစ်အင်အားများတိုးချဲ့ကာ လေကြောင်းတိုက်ခိုက်မှုများ၊ လက်နက်ကြီးပစ်ကူများဖြင့် ၎င်းစခန်းအနီးတဝိုက် အပြင် တခြားရက္ခိုင်နှင့်ပလက်ဝရှိ နေရာများကိုပါ ပြင်းပြင်းထန်ထန် ထိုးစစ်ဆင်နေကြောင်း ကေ ထုတ်ပြန်သည်။
ထိုသို့ ထိုးစစ်ဆင်နေသည်မှာ တစ်ပတ်ကျော်ကြာပြီဖြစ်ကြောင်းနှင့် ယမန်နေ့က သိမ်းပိုက်ခဲ့သည့် တပ်စခန်းကုန်းသည် မိုင်တိုင်အမှတ် (၄၀) မှ ဝေးကွာသောနေရာ၌ ရှိကြောင်း ဖော်ပြထားသည်။
တိုက်ပွဲနောက်ဆက်တွဲသတင်းများကို ဖော်ပြမည်ဟုလည်း AAက အသိပေးထုတ်ပြန်ခဲ့ရာ ယနေ့(စက်တင်ဘာ ၁၁)တွင် သိမ်းဆည်းရမိသောလက်နက်ခဲယမ်းများကိုထပ်မံထုတ်ပြန်ခဲ့ခြင်းဖြစ်သည်။
