စသ်ကိုင်းတိုင်း ပုလဲမြို့နယ် အင်မထီးကျေးရွာမှ စစ်ကောင်စီနှင့် ပျူစောထီးများက ဒေသခံများ ရွာအပြင်ထွက်ပါက PDFက သတ်ဖြတ်လိမ့်မည်ဟု ခြိမ်းခြောက်ထားပြီး အရပ်သားများကို နည်းမျိုးစုံထိန်းချုပ်ထားသည်ဟု ပြည်သူ့ကာကွယ် ရေးရဲဘော်များက ပြောသည်။
အင်းမထီးကျေးရွာသည် စစ်ကောင်စီတပ် အထိုင် ချထားပြီး ပျူစောထီး အားကောင်းသည့်ရွာဖြစ် ၍ ပျူရွာအဖြစ် နာမည်ကြီးသည်။
သို့သော် စစ်အာဏာရှင်ကို ဆန့်ကျင်သည့် ဒေသခံများလည်း အများအပြားရှိနေပြီး ယင်းဒေသခံများသည် စစ်ကောင်စီနှင့်ပျူစောထီးများက ခြိမ်းခြောက်ထား၍ ကျေးရွာအတွင်း ပိတ်မိနေသည်။
” ပိတ်မိနေတာတွေရှိတယ်။ ထွက်ပြေးလာသူတွေလည်း ရှိတယ်။ကျန်နေတဲ့ ပြည်သူတွေကို မှိုင်းသွင်းထားတာက ထွက်တာနဲ့ PDF တွေကသတ်မှာဆိုပြီး မှိုင်းတိုက်ထားတယ်”ဟု ပုလဲပြည်သူ့ကာကွယ်ရေးတပ်ဖွဲ့၊ တပ်ရင်း(၆)မှ တပ်ဖွဲ့ဝင်တစ်ဦးက ပြောသည်။
Public Service Announcement
ပိတ်မိနေသည့် ဒေသခံများ အခြေအနေပေးသည် နှင့်တပြိုင်နက် ထွက်လာခဲ့ရန်နှင့် စစ်ကောင်စီနှင့်ပျူစောထီးများ မှိုင်းတိုက်ထားသလို အန္တရာယ် ပြုမည်မဟုတ်ကြောင်းပြည်သူ့ကာကွယ်ရေးရဲဘော်များက ပြောသည်။
အင်မထီးရွာမှ ပျုစောထီးများသည် ယခုရက်ပိုင်းအတွင်း စစ်ကောင်စီစစ်ကြောင်းဖြင့် လိုက်ပါကာ အနီးပတ်ဝန်းကျင်ကျေးရွာများသို့ အကြမ်းဖက် မွှေနှောက်နေသည်။
စစ်ကောင်စီနှင့် ပျူစောထီးအင်အား ၂၀၀ခန့်သည် စက်တင်ဘာ ၉ရက်က လှော်ကားနှင့်တနယ် ကျေးရွာ ဝင်ရောက်ကာ ဒေသခံများ၏ အိမ်သုံးပစ္စည်းများနှင့် စားသောက်ကုန်များကို လှည်း ၃၇စီးဖြင့် သယ်ထုတ်သွားသည်ဟု ဒေသခံတစ်ဦးက ပြောသည်။
ထို့အပြင် တနယ်ရွာမှ အမျိုးသားတစ်ဦးကိုလည်း သေနတ်ဖြင့် ပစ်သတ်သွားခဲ့သည်ဟု ဆိုသည်။
