'/%3E%3C/svg%3E){kind=small}
မြ၀တီ-ဝေါ်လေ လမ်းပိုင်းပေါ်က မြွေသုံးကောင်နဲ့ သဲဖြူချောင်းဂိတ်အနီး နေရာယူတပ်စွဲထားတဲ့ စစ်ကောင်စီတပ်နဲ့ ကော်ဘရာစစ်ကြောင်းတို့ကြား သုံးနာရီကျော်ကြာတိုက်ပွဲ ဖြစ်ပွားခဲ့ပြီး စစ်ကောင်စီဘက်က ထိခိုက်ကျ ဆုံးမှုတွေရှိခဲ့တယ်လို့ ကော်ဘရာစစ်ကြောင်းက သတင်းထုတ်ပြန်ပါတယ်။
ဒီကနေ့ စက်တင်ဘာ(၁၂)ရက် နေ့လည်(၁၂)နာရီအချိန်ခန့်မှာ မြ၀တီ-ဝေါ်လေ လမ်းပိုင်းရဲ့ မြွေသုံးကောင်နဲ့ သဲဖြူချောင်းဂိတ်အနီး တပ်စွဲနေရာယူထားတဲ့ စစ်ကောင်စီတပ်ကို ကော်ဘရာစစ်ကြောင်းက ဝင်ရောက်တိုက်ခိုက်ခဲ့တာဖြစ်ပြီး စစ်ကောင်စီဘက်က ထိခိုက်ကျဆုံးမှုရဲ့ အရေအတွက်ကို အတည်မပြုနိုင်သေးဘူးလို့ ထုတ်ပြန်ချက်က ဆိုပါတယ်။
အဆိုပါတိုက်ပွဲဖြစ်စဉ်အတွင်း စစ်ကောင်စီဘက်က လက်နက်ကြီးပစ်ခတ်မှုကြောင့် ကော်ဘရာစစ်သည်တော်တစ်ဦး (မစိုးရိမ်ရ) ထိခိုက်ဒဏ်ရာရှိခဲ့ပြီး တိုက်ပွဲကတော့ ဒီကနေ့ညနေ သုံးနာရီခွဲခန့်မှာ ငြိမ်သက်သွားခဲ့တယ်လို့ ကော်ဘရာစစ်ကြောင်းက ဆိုပါတယ်။
မြ၀တီ-ဝေါ်လေ ကားလမ်းမပေါ်ရှိ ကျော်ဝါးဘိုးဘုရားကုန်းမှာ အခြေပြုထားတဲ့ စစ်ကောင်စီတပ်က ဒီကနေ့မနက်အစောပိုင်းကနေစတင်ပြီး ကရင်အမျိုးသားလွတ်မြောက်ရေးတပ်မတော် တပ်ရင်း(၂၇)၊ ကော်ဘရာစစ်ကြောင်းပူးပေါင်းတပ်ဖွဲ့က နေရာယူထားတဲ့နေရာတွေကို လက်နက်ကြီးနဲ့ ရမ်းသန်းပစ်ခတ်မှုတွေပြုလုပ်ခဲ့တယ်လို့ ကော်ဘရာစစ်ကြောင်းက သတင်းထုတ်ပြန်ထားတာဖြစ်ပါတယ်။
Public Service Announcement
