မတူပီမြို့ထွက်ရှိစစ်ကောင်စီစခန်းကို CDFဝင်တိုက်၊ စစ်ကောင်စီတပ်သား ၆ဦးသေ

မတူပီမြို့မှ ၂မိုင်အကွာတွင်ရှိသည့် စစ်ကောင်စီရှေ့တန်းကင်းစခန်းတစ်ခုကို စက်တင်ဘာ၁၉ရက်ညနေ့ပိုင်းတွင် ချင်း​ဒေသကာကွယ်​ရေးတပ် -CDF(မတူပီ)က ဝင်ရောက်တိုက်ခိုက်ခဲ့ရာ စစ်ကောင်စီတပ်သား ၆ဦးသေဆုံးခဲ့ကြောင်း CDF(မတူပီ)က သတင်းထုတ်ပြန်သည်။

အဆိုပါ စစ်ကောင်စီတပ်ဂိတ်စခန်းသည့် မတူပီမြို့အဝင်မှ နှစ်မိုင်အကွာတွင်ရှိပြီး အများပြည်သူ အသုံးပြုနေသည့် လမ်းကို စစ်ကောင်စီတပ်က ပိတ်ဆို့စစ်ဆေးမှုများပြုလုပ်နေခြင်းကြောင့် ပြည်သူနှင့်လူနာများ အခက်အခဲများကြုံတွေ့နေရခြင်းကို လက်တုန့်ပြန်ခြင်းဖြစ်သည်ဟု CDF(မတူပီ)ကအသိ​ပေးသည်။

ထိုတိုက်ခိုက်မှုကြောင့် စစ်ကောင်စီတပ်သား ၆ ဦးသေဆုံးကာ ၈ဦး ဒဏ်ရာရရှိခဲ့သည်။ CDF (မတူပီ) ဘက်မှ အထိအခိုက်မရှိဘဲ ပြန်လည်ဆုတ်ခွာနိုင်ခဲ့သည်ဟုလည်း​ဖော်ပြထားသည်။ စစ်​ကောင်စီတပ်​သေဆုံးထိခိုက်မှုအ​ခြေအ​နေကို People’s Spring ကသီးခြားအတည်မပြုနိုင်ပါ။

တိုက်ပွဲဖြစ်ပွားခဲ့ေသာ်လည်း လက်ရှိတွင် စစ်ရေးတည်ငြိမ်လျက်ရှိသည်ဟု CDF(မတူပီ)ကဆိုထားသည်။

Public Service Announcement

ထိုသို့တိုက်ခိုက်မှုအပြီးအတွင် စစ်ကောင်စီတပ်များ မတူပီဒေသခံများကို မြို့တွင်း၌ တားဆီးစစ်ဆေးမှုများပိုမိုပြုလုပ်လာကြောင်း ဒေသခံများကပြောသည်။

“သူတို့ စခန်းဝင်ပစ်ခံရလို့ပြောတယ်။ လာသမျှ ဆိုင်ကယ်နဲ့လူတွေကို တားပြီး အကုန်စစ်တာ၊”ဟု မတူပီဒေသခံတစ်ဦးကပြောသည်။