ရဲဘော်တစ်ဦးကျဆုံးခဲ့သည့် မြောင်ဗိုလ်နေတိုးစခန်းစီးနင်းခံရမှုတွင် တိုက်ခိုက်ရေးသုံးပစ္စည်းများအပါ အဝင် ကျပ်သိန်း ၁၅၀ဖိုးခန့် ဆုံးရှုံး

ပြည်သူ့ရဲဘော်တစ်ဦးကျဆုံးခဲ့သည့် စစ်ကိုင်းတိုင်း၊ မြောင်မြို့နယ်အခြေစိုက် ဗိုလ်နေတိုးပြောက်ကျားအထူးတပ်ဖွဲ့စခန်းအား စစ်ကောင်စီတပ်က ဝင်ရောက် စီးနင်းတိုက်ခိုက်ခံရမှုတွင် တိုက်ခိုက် ရေးသုံးပစ္စည်းများအပါအဝင် ကျပ်သိန်း ၁၅၀ဖိုးခန့် ဆုံးရှုံးခဲ့ကြောင်း ၎င်းအဖွဲ့က သတင်းထုတ်ပြန်သည်။

စက်တင်ဘာ၂၂ ရက်နံနက် ၅ နာရီခန့်က မြောင် မြို့နယ်အ​ခြေစိုက်၊ ဗိုလ်နေတိုးပြောက်ကျားအထူးတပ်ဖွဲ့၊ စစ်ကိုင်းခရိုင်တပ်ရင်း(၆)တပ်ခွဲ(၃) ၏ အထိုင်စခန်းအား စစ်ကောင်စီတပ်က အင်အားအမြောက်အများအသုံးပြုကာ စစ်ကြောင်း၂ကြောင်းဖြင့် ပိတ်ဆို့စီးနင်းခဲ့သည်။

ထိုသို့စီးနင်းတိုက်ခိုက်ရာတွင် ခုခံချိန်မရခြင်း၊လက်နက်အင်အား ပြည့်စုံမှုမရှိခြင်းတို့ကြောင့်စခန်းစီးနင်းခံရမှုတွင် မဟာမိတ်အဖွဲ့ဖြစ်သည့် ဗိုလ်တောက်ထွန်း(MBTT)အဖွဲ့ဝင် ရဲဘော်တစ်ဦး ကျဆုံးခဲ့ရခြင်းဖြစ်ကြောင်း ဗိုလ်နေတိုးပြောက်ကျားအထူးတပ်ဖွဲ့က ပြောသည်။

စခန်းအားဝင်ရောက်စီးနင်း ဖျက်ဆီးခံလိုက်ရပြီး အဆောင်များ၊မိုင်းများ၊မိုင်းဆက်စပ်ပစ္စည်းများ၊ထုတ်လုပ်ရေးဆက်စပ်ပစ္စည်းများ၊ငွေသားသိန်းနှစ်ဆယ်၊ ယမ်းများ၊ကျည်များနှင့်အဝတ်အစားများ စုစုပေါင်းကာလတန်ဖိုး သိန်းတစ်ရာ့ငါးဆယ်ကျော်ခန့် ဆုံးရှုံးခဲ့ရသည်ဟု ဗိုလ်နေတိုးပြောက်ကျားအထူးတပ်ဖွဲ့က အသိပေးသည်။

Public Service Announcement

တပ်ဖွဲ့အတွက် ရိက္ခါပစ္စည်းများပြန်လည်ဖြည့်တင်းရန် အကူအညီများစွာ လိုအပ်နေ၍ အာဏာရှင်မလိုလားသောပြည်သူများအနေဖြင့် ကူညီပေးကြပါရန်နှင့် အာဏာရှင်အမြစ်ပြတ်သည်အထိ ဆက်လက်တိုက်ပွဲဝင်သွားမည်ဟု ဗိုလ်နေတိုးပြောက်ကျားအထူးတပ်ဖွဲ့က ကတိပြုထားသည်။