တနင်္သာရီတိုင်း ရေဖြူမြို့နယ် မိုင်တိုင်(၂၈)အနီးတွင် စစ်ကောင်စီတပ်ယာဥ်တန်းအား မိုင်းနှစ်လုံးဖြင့် ဖောက်ခွဲတိုက်ခိုက်ခဲ့ရာ စစ်ကောင်စီတပ်မှ ထိခိုက် သေဆုံးရှိနိုင်ကြောင်း ရေဖြူပြည်သူ့ကာကွယ်ရေးတပ်ဖွဲ့(YPPDF)က ယနေ့(စက်တင်ဘာ ၂၅)ထုတ်ပြန် သည်။
စက်တင်ဘာ ၂၄ ရက်နံနက် ၆ နာရီခန့်က ထားဝယ်မြို့ဘက်မှလာသော စစ်ကောင်စီတပ်များလိုက်ပါလာသည့် Vigo ကားသုံးစီးနှင့် Probox ကားတစ်စီးတို့ကို ရေဖြူနယ် မိုင်တိုင် (၂၈)အနီးတွင် ရှေ့ထွက်မိုင်းတစ်လုံး၊ YPPDF က စမ်းသပ်ထုတ်လုပ်ထားသော လက်လုပ်မိုင်းတစ်လုံးတို့ဖြင့် ဖောက်ခွဲတိုက်ခိုက်ခဲ့ခြင်းဖြစ်ကြောင်း ဖော်ပြသည်။
ရေး – ထားဝယ်လမ်းအတိုင်းမောင်းနှင်လာသည့် အထက်ပါ စစ်ကောင်စီတပ်မှ ကားလေးစီးတွင် နှစ်စီးမိုင်းထိပြီး ထိုးရပ်သွားရာ စစ်ကောင်စီတပ်ဘက်မှ (၄၀)မမအပါအဝင် စစ်သေနတ်များဖြင့် ၅ မိနစ်ခန့်ပစ်ခတ်ခဲ့သော်လည်း တော်လှန်ရေးရဲဘော်များ အထိအခိုက်မရှိခဲ့ဟု ဆိုသည်။
“စစ်ကောင်စီတပ်သားများမှာ အထိအခိုက်အကျဆုံးရှိသည်”ဟု ရေဖြူပြည်သူ့ကာကွယ်ရေးတပ်ဖွဲ့ (YPPDF)က ဖော်ပြသည်။
Public Service Announcement
YPPDF နှင့် မဟာမိတ်ညီနောင်တပ်ဖွဲ့များသည် စစ်ကောင်စီတပ်နှင့် ပြည်သူ့စစ်အဖွဲ့များအား အလျဥ်းသင့်သလို တိုက်ခိုက်သွားမည်ဖြစ်ရာ ပြည်သူများအနေဖြင့် ၎င်းတို့နှင့် နီးကပ်စွာနေထိုင်သွားလာခြင်းမပြုလုပ်ကြရန်နှင့် စစ်ကောင်စီတပ်နှင့် ပူးပေါင်းလုပ်ဆောင်နေသည့် လုပ်ငန်းများ ချက်ချင်းရပ်တန့်ပေးရန် တောင်းဆိုထားသည်။
