စစ်ရေးဆက်လက်တင်းမာနေဆဲဟု မိုးဗြဲပြည်သူ့ကာကွယ်ရေးတပ်ပြော
မိုးဗြဲမြို့တိုက်ပွဲ ဆက်လက်တင်းမာနေဆဲဖြစ်ပြီး စက်တင်ဘာတစ်လတိုက်ပွဲအတွင်း အကြမ်းဖက်စစ်ကောင်စီတပ်မှ ၈၀ဦးထက်မနည်းသေဆုံးခဲ့ကာ ရဲဘော်ကိုးဦးကျဆုံးခဲ့ရကြောင်း မိုးဗြဲပြည်သူ့ကာကွယ်ရေးတပ်(MBPDF)က ယနေ့(အောက်တိုဘာ ၂ ရက်)တွင် ထုတ်ပြန်သည်။
ယခင်လ ၈ရက်ကစ၍ အကြမ်းဖက်စစ်ကောင်စီ၏ ထိုးစစ်ကို မိုးဗြဲ PDFတပ်ရင်း (၁) ၊ တပ်ရင်း (၂) ၊ဖယ်ခုံ တပ်ရင်း (၁) ၊တပ်ရင်း (၂)၊လွိုင်ကော် PDF၊အလယ်ပိုင်းတိုင်းအထူးစစ်ဆင်ရေးတပ်ဖွဲ့၊ဒီးမော့ဆို ပြည်သူ့ကာကွယ်ရေးတပ် (DMO)၊နေပြည်တော် PDF၊ကရင်နီအမျိုးသားများကာကွယ်ရေးတပ်(KNDF)၊ကရင်နီတပ်မတော် (KA)၊KGZ နှင့် URF တို့က ပူးပါင်း၍ ခုခံတိုက်ခိုက်ခဲ့သည်ဟု ဆိုသည်။
တိုက်ပွဲများအတွင်း အကြမ်းဖက်စစ်ကောင်စီတပ်မှ ၈၀ ဦးထက်မနည်းသေဆုံးပြီး အများအပြားဒဏ်ရာရရှိကြောင်း အသိပေးသည်။
အလားတူ ကရင်နီမဟာမိတ်တပ်ပေါင်းစုမှ ဒဏ်ရာရရှိသူ ၅၄ ဦး၊စိုးရိမ်ရဒဏ်ရာရရှိသူ ၁၀ ဦး အပါအဝင် မိုးဗြဲ PDF တပ်ရင်း (၁)မှရဲဘော် ငါးဦး၊တပ်ရင်း (၂) မှ ရဲဘော်တစ်ဦး၊ဖယ်ခုံ တပ်ရင်း (၂) မှ ရဲဘော်တစ်ဦး နှင့် URF မှ ရဲဘော်နှစ်ဦး ကျဆုံးခဲ့ရသည်။
Public Service Announcement
ထို့အပြင် KNDF တပ်ရင်း (၃)မှရဲဘော်တစ်ဦးမှာလည်း ပျောက်ဆုံးနေဆဲ ဖြစ်ကြောင်း MBPDF က ဆိုသည်။
တိုက်ပွဲများအတွင်းအကြမ်းဖက်စစ်ကောင်စီ၏ လက်နက်ကြီးပစ်ခတ်မှုကြောင့် အရပ်သားပြည်သူ ၁၃ဦးဒဏ်ရာရရှိကာ အသက် (၁၀)နှစ်အောက် ကလေးငယ်သုံးဦး အပါအဝင် ပြည်သူ ခြောက်ဦးလည်း သေဆုံးခဲ့သည်။
“လက်ရှိ အနေအထားက စခ ဘက်ကလည်း တပ်ဖြန့်ပြီး နေရာယူထားတယ်။ပြီးတော့ နေ့စဥ် လက်နက်ကြီးနဲ့ ပစ်ခတ်နေတုန်း။တိုက်ပွဲ ဆိုင် နေတယ်လို့ ပြောလို့ရတယ်”ဟု MBPDF တာဝန်ရှိသူက လူထုနွေဦးသို့ ပြောသည်။
ထို့ကြောင့် ပြည့သူများအနေဖြင့် တိုက်ပွဲသတင်း နားစွင့်ရန် နှင့် မိုးဗြဲမြို့တွင်း စစ်ကောင်စီထောင်ထားသည့် မိုင်းများရှိနေသောကြောင့် အသွားအလာနှင့် နေရပ်ပြန်ခြင်းမပြုလုပ်သေးရန်လည်း အထူးသတိပေးသည်။
ကရင်နီဒေသအတွက် စစ်ရေးအရ အရေးပါသော မိုးဗြဲမြို့ကို ထိန်းချုပ်နိုင်ရန် အကြမ်းဖက်စစ်ကောင်စီတပ်က အကြိမ်ကြိမ်ကြိုးပမ်း ခဲ့ပြီး ယခုတစ်ကြိမ်ထိုးစစ်တွင် တင့်ကား ခြောက်စီးထက်မနည်းအသုံးပြုကာမြေပြင်အင်အား ၃၀၀ ကျော်ပါရှိကြောင်း ကရင်နီစစ်ရေးသတင်း ရင်းမြစ်များက အတည်ပြုသည်။
တိုက်ပွဲမှာ ရေရှည်ဆက်လက်ပြင်းထန်နိုင်သောကြောင့် ကျည် နှင့် ခဲယမ်းများကို ပြည်တွင်း၊ပြည်ပ ရှိပြည်သူများအနေဖြင့် ဆက်လက်ထောက်ပံ့ပေးရန် MBPDF က မေတ္တာရပ်ခံထား သည်။
