ဖာပွန်ခရိုင်၌ အောက်တိုဘာဒုတိယပတ်အတွင်း တိုက်ပွဲများ ဆက်ဖြစ်၊ စစ်ကောင်စီတပ် သေဆုံးထိခိုက်မှုရှိပြီး လက်နက်ခဲယမ်းအချို့ KNU သိမ်းဆည်းရရှိ

ကရင်အမျိုးသားအစည်းအရုံး(KNU) ဖာပွန်ခရိုင် တပ်မဟာ(၅)နယ်မြေ၌ အောက်တိုဘာ ဒုတိယ ပတ်အတွင်း တိုက်ပွဲများဆက်လက်ဖြစ်ပွားပြီး စစ်ကောင်စီတပ်မှ သေဆုံးထိခိုက်မှုရှိပြီးလက်နက်ခဲယမ်းအချို့သိမ်းဆည်းရရှိခဲ့ကြောင်းKNU သတင်းရင်းမြစ်က ပြောသည်။

KNU တပ်မဟာ(၅)နယ်မြေ၌ အောက်တိုဘာ ၁၁ ရက်မှ ၁၃ရက်အတွင်း တိုက်ပွဲဖြစ်ပွားမှုများကို ကရင်ဘာသာဖြင့် ထုတ်ပြန်ထားရာ KNU သတင်းရင်းမြစ်က ပြန်လည်ရှင်းပြခြင်းဖြစ်သည်။

” ဒီအတောအတွင်း တိုက်ပွဲတွေလည်းဖြစ်တယ်။ ဖြစ်တော့ စစ်တပ်ဘက်က ၇ယောက်သေတာပေါ့။ ၂ယောက်ဒဏ်ရာရတာပေါ့။ တိုက်ပွဲတွေ နေ့တိုင်းလိုလို တိုက်ပွဲဖြစ်တာ။ ဒွယ်လိုမြို့နယ်မှာ” ဟု ၎င်းက ဆိုသည်။

စစ်ကောင်စီတပ်ကလည်း ဒေသခံများ ရှိရာသို့ လက်နက်ကြီးများဖြင့် ပစ်ခတ်၍အရပ်သား ပြည်သူအချို့ ထိခိုက်မှုရှိခဲ့သည်ဟု KNU သတင်းရင်းမြစ်က ပြောသည်။

Public Service Announcement

အောက်တိုဘာ ၁၂ရက်တိုက်ပွဲတွင် ရန်သူ့ဘက် က လေးဦးသေဆုံးကာ နှစ်ဦး ဒဏ်ရာရခဲ့ကြောင်း၊ အောက်တိုဘာ ၁၁ရက်တိုက်ပွဲ၌ ရန်သူ့ဘက်က သုံးဦးသေဆုံးခဲ့ကြောင်း ၎င်းက ရှင်းပြသည်။

” အဲဒီမှာ ရန်သူ့ဆီက AK တစ်လက်ရယ်။ နောက် ပြီးတော့ စကားပြောစက်နှစ်လုံးရယ်ရတယ်”ဟု KNU သတင်းရင်းမြစ်က ပြောသည်။

ထို့ပြင် RPG ကျည် ၂လုံးနှင့် (၇၉) မမ ကျည် ၆ လုံးအပါအဝင် လက်နက်ကြီး၊ လက်နက်ငယ်ကျည်အချို့ ရရှိခဲ့သည်ဟု ဆိုသည်။

ဖာပွန်ခရိုင်တွင် စစ်ကောင်စီနှင့် ၎င်း၏ လက်အောက်ခံ နယ်ခြားစောင့်တပ်ကို တပ်မဟာ (၅)ရဲဘော်များက ခြုံခိုတိုက်ခိုက်မှုများ ဆက်တိုက်လုပ်ဆောင်လျက်ရှိရာ တိုက်ပွဲများ နေ့စဉ်နီးပါးဖြစ်ပွားလျက်ရှိသည်။