မကွေးတိုင်း၊ စလင်းမြို့နယ်ရှိ လင်းဇင်းတိုက်နယ် ရဲစခန်းဝင်းအတွင်းရှိ စခန်းမှူးအိပ်ဆောင်တွင်းသို့ ဝင်ရောက်ကာ ဗုံးထောင် ဖောက်ခွဲတိုက်ခိုက်ခဲ့ကြောင်း ပြည်သူ့ကာကွယ်ရေးတပ်မတော် – အနောက်ပိုင်းတိုင်း(LDF)တပ်ဖွဲ့က အသိပေးထုတ်ပြန်သည်။
ယနေ့(အောက်တိုဘာ ၃၀ရက်)နံနက် ၂နာရီခန့်က မကွေးတိုင်း၊ မင်းဘူးခရိုင်၊ စလင်းမြို့နယ်၊ ပုသိမ်-မုံရွာကားလမ်းအနီးရှိ လင်းဇင်းတိုက်နယ် နယ်မြေခံရဲစခန်းဝင်းအတွင်း စခန်းမှူးအိပ်ဆောင် တွင်းသို့ ဝင်ရောက်ဗုံးထောင် ဖောက်ခွဲတိုက်ခိုက် ခဲ့ခြင်းဖြစ်သည်။
ပြည့်သူ့ကာကွယ်ရေးတပ်မတော် အနောက်ပိုင်းတိုင်း ၊ စလင်းတပ်ခွဲ ရဲဘော်များက အဝေးထိန်းရီမုမိုင်းနှစ်လုံးအား ရဲစခန်းဝင်းအတွင်း အိပ်ဆောင်ပေါ်အထိသွားရောက်တပ်ဆင်ကာ အဝေးမှ ဖောက်ခွဲတိုက်ခိုက်ခဲ့ခြင်းဖြစ်ကြောင်း ပြည်သူ့ကာကွယ်ရေးတပ်မတော် – အနောက်ပိုင်းတိုင်း (LDF)တပ်ဖွဲ့က အသိပေးသည်။
သို့သော် ထိခိုက်သေဆုံးမှု နောက်ဆက်တွဲအခြေအနေများအား စုံစမ်းဆဲဖြစ်ပြီး ရဲဘော်များ အထိအခိုက်မရှိ ဆုတ်ခွာနိုင်ခဲ့သည်ဟု ဆိုသည်။
Public Service Announcement
ပြည်သူ့ကာကွယ်ရေးတပ်မတော် – အနောက်ပိုင်းတိုင်း (LDF)တပ်ဖွဲ့သည် သက်ဆိုင်ရာတပ်ခွဲများအလိုက် လက်နက်ကိုင် တော်လှန်ရေးကို အကောင် အထည်ဖော်ဆောင်ရွက်လျက်ရှိပြီး ပြည်သူများအနေဖြင့်လည်း နိုင်ရာတာဝန်များကို ပါဝင်ကူညီထမ်းဆောင်ရင်း တော်လှန်ရေးအရှိန် ဝိုင်းဝန်းမြှင့်တင်ကြရန် ၎င်းအဖွဲ့က နှိုးဆော်ထားသည်။
ဖြစ်စဥ်နှင့်ပတ်သက်၍ ပြည်သူ့ကာကွယ်ရေးတပ်မတော် – အနောက်ပိုင်းတိုင်း (LDF ) တပ်ဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
