စစ်ကိုင်းတိုင်း၊ ရွှေဘိုမြို့နယ်ရှိ စစ်အုပ်စုနှင့်ပျူစခန်းကို အဝေးထိန်းမိုင်းဖြင့် တိုက်ခိုက်ခဲ့ပြီးနောက် ထွက်လာသည့် စစ်ကောင်စီတပ်သားကိုပါ ထပ်မံမိုင်းဆွဲတိုက်ခိုက်ခဲ့ကြောင်း နေလစင်္ကြာ-Shwebo PDF ပြန်ကြားရေးတာဝန်ခံက ပြောသည်။
ယမန်နေ့ (နိုဝင်ဘာလ ၁၈ ရက်) နံနက် ၃နာရီခန့်က ရွှေဘိုမြို့နယ်၊ ကော့ကျေးရွာရှိ စစ်ကောင်စီတပ်နှင့်ပျူများ စခန်းအနီးထောင်ထားသော တိုက်မိုင်းသုံးလုံးကို ဖောက်ခွဲခဲ့ကြောင်း နေလစင်္ကြာ-Shwebo PDF ပြန်ကြားရေးတာဝန်ခံက ပြောသည်။
မိုင်းပေါက်ကွဲမှုကြောင့် စခန်းအတွင်းရှိ စစ်အုပ်စုက ဆက်တိုက်ပစ်ခတ်ပြီး ရှေ့တက်လာခဲ့ရာ မိုင်းကွင်းအတွင်း ရောက်လာ၍ အဝေးထိန်းမိုင်းသုံးလုံးဖြင့် ထပ်မံဖောက်ခွဲတိုက်ခိုက်ခဲ့သည်ဟု ပြန်ကြားရေးတာဝန်ခံက ပြောသည်။
ထိုသို့ တိုက်ခိုက်မှုများကြောင့် စစ်ကောင်စီတပ်နှင့်ပျူ သုံးဦး သေဆုံးပြီး ကျန် ၁၀ဦးခန့်မှာ အပြင်းအထန် ဒဏ်ရာရရှိသွားသည်ဟု ၎င်းက ဆိုသည်။
Public Service Announcement
“၄၀၊၆၀တွေ ပစ်တုန်းကတော့ အမိုးတွေပျက်စီးသွားတာတော့ရှိပါတယ်။ ကော့ရွာက စစ်တပ်နဲ့ပျူတွေက အနီးနားက ရွာတွေကိုမွှေတယ်။ ပစ္စည်းတွေယူတယ်။ ရွာတောင်ဘက် ပေလမ်းပေါ်တခါတရံတတ်ပြီး ကားတွေ၊ ဆိုင်ကယ်တွေစစ်ပြီးငွေညှစ်တတ်တယ်ဗျ။ အဲ့ရွာခံတစ်ချို့နဲ့ အနီးအနားရွာကတချို့တွေ ရှောင်တိမ်းနေရတဲ့သူတွေလည်းရှိတယ်ဗျ။”ဟု နေလစင်္ကြာ-Shwebo PDF ပြန်ကြားရေးတာဝန်ခံက ပြောသည်။
အဆိုပါ တိုက်ခိုက်မှုများကို နေလစင်္ကြာ-Shwebo PDF၊ Ghost Rider Special Task Force(Burma)နှင့် Shwebo Wetlet Special Task Force အဖွဲ့တို့ ပူးပေါင်းတိုက်ခိုက်ခဲ့ခြင်းဖြစ်ကြောင်း အသိပေးထားသည်။
