စစ်ကောင်စီတပ်က ထီးချိုင့်မြို့နယ်ကို စစ်ကြောင်းထိုးပြီး ကျေးရွာများကို မီးရှို့ဖျက်ဆီးလျက်ရှိရာ ယမန်နေ့က အင်ကြင်းကုန်းကျေးရွာ နှင့် အလယ်တောရွာ မီးရှို့ခံခဲ့ရပြီး ယနေ့မနက်တွင် အင်ကြင်းကုန်းရွာကို ထပ်မံ မီးရှို့နေကြောင်း ဒေသခံက ပြောသည်။
“အခုနောက်ထပ်တစ်ရွာကိုထပ်ရှို့ဖို့ သူတို့ ထပ်ထွက်နေပါပြီ။ အင်းတိမ်ဆိုတဲ့ရွာကို ဦးတည်နေပါပြီ။ မနေ့ကတော့ အင်ကြင်းကုန်းရွာကတော့ ရွာလုံးကျွတ်ပါပဲ။ အခုမနက်တင်ကို ကျန်တဲ့အိမ်ကို ထပ်ရှို့နေပါတယ်။ အလယ်တောကတော့မသိရသေးပါဘူး။ အလယ်တောမှာလည်း သူတို့ ရှိနေတဲ့အတွက်။ အင်ကြင်းကုန်းကို သူတို့ ထပ်ရှို့ပြီး အင်းတိန်ရွာဘက်ကို ဆက်လက်ပြီး ထွက်ခွာနေပါပြီ အဲဒီ မီးရှို့တပ်ဖွဲ့ကြီးက” ဟု ဒေသခံက ပြောသည်။
နိုဝင်ဘာ ၂၅ရက်ကလည်း ထီးချိုင့်မြို့နယ် ဆူးပုတ်ချောင်ရွာကို စစ်ကောင်စီတပ်က မီးရှို့ခဲ့ရာ အိမ်ခြေ ၃၅ လုံးထက်မနည်း ပျက်စီးခဲ့သည်။
ဆူးပုတ်ချောင်ရွာကို စစ်ကောင်စီတပ် မီးရှို့ပြီးနောက် နိုဝင်ဘာ ၂၇ရက်တွင် ဒေသခံ ပြည်သူ့ကာကွယ်ရေးတပ်များက စစ်ကောင်စီတပ်ကို ခုခံတိုက်ခိုက်ခဲ့ရာ တိုက်ပွဲပြင်းထန်ခဲ့ပြီး စစ်ကောင်စီတပ်က လေကြောင်းပစ်ကူဖြင့်တိုက်ခိုက်ခဲ့သည်။
စစ်ကောင်စီတပ်ကလေကြောင်းတိုက်ခိုက်မှုကို နိုဝင်ဘာ ၂၇ရက်နှင့် ၂၈ရက်တို့တွင် နှစ်ရက်ဆက်ပြုလုပ်ခဲ့ရာ ဒေသခံ ကာကွယ်ရေးရဲဘော်အချို့နှင့် အရပ်သားအချို့ထိခိုက်ဒဏ်ရာရရှိခဲ့သည်။
“ ကြီးကြီးမားမားရင်ဆိုင်တိုက်ပွဲကတော့ အင်ကြင်းကုန်းကို မပေးရခင်အထိတော့ ဝိုင်းပြီးတိုက်ကြတယ်။ အခုကြတော့ ပေးလိုက်ရတဲ့အခါကျတော့ တော်တော်လေး ဆုတ်ခွာထားပေးရတဲ့ အနေအထားဖြစ်နေတဲ့အခါကျတော့ သူတို့ လုပ်ချင်တိုင်း လုပ်နေရပါတယ်ဗျ” ဟု ဒေသခံက ပြောသည်။
ထီးချိုင့်နယ်ကို ဝင်လာသည့် စစ်ကြောင်း ၂ ကြောင်းဖြစ်ပြီး လက်ရှိတွင် စစ်ကြောင်း နှစ်ခု ပေါင်းသွားရာ အင်အား ၁၈၀ ကျော်ရှိနိုင်သည်ဟု ဒေသခံကခန်မှန်းသည်။
စစ်ကောင်စီတပ်သည် ထီးချိုင့်အပါအဝင် စစ်ကိုင်းတိုင်းရှိ မြို့နယ်များမှ ကျေးရွာများသို့ စစ်ကြောင်းထိုးပြီး ပြည်သူလူထုနေအိမ်များ၊ စပါးကျီကို အကြောင်းမဲ့ မီးရှို့ ဖျက်ဆီးမှုများဆက်တိုက်ပြုလုပ်နေသည်။ထို့အပြင်အရပ်သားပြည်သူများကိုဖမ်းဆီးသတ်ဖြတ်ခြင်းများလည်းဆက်တိုက် ကျူးလွန်နေသည်။