စစ်ကိုင်းတိုင်း၊ မြောင်မြို့နယ်ရှိ ဆွဲလွဲအိုရွာနှင့် နဘတ်ကျေးရွာကြား စစ်ကြောင်းထိုးနေသော စစ်ကောင်စီတပ်အား နှစ်ရက်ဆက် မိုင်းဆွဲတိုက်ခိုက်ခဲ့ကြောင်း လျှပ်တစ်ပြက်စွန်ညို ပြောက်ကျားတပ်ဖွဲ့က သတင်းထုတ်ပြန်သည်။
ယမန်နေ့(ဒီဇင်ဘာ ၁၄ ရက်) ည ၁၀နာရီခွဲခန့်က မြောင်မြို့နယ်၊ ဆွဲလွဲအိုရွာတွင်းမှ နဘတ်ကျေးရွာဘက်သို့ဦးတည်ထွက်လာသော စစ်အုပ်စုအား အဆိုပါ ကျေးရွာ ကြား၌ ရှေ့ထွက်မိုင်း နှစ်လုံးဖြင့် ပစ်ခတ်တိုက်ခိုက်ခဲ့ကြောင်း လျှပ်တစ်ပြက်စွန်ညို ပြောက်ကျားတပ်ဖွဲ့က အသိပေးသည်။
ယနေ့(ဒီဇင်ဘာ ၁၅ ရက်)နံနက် ၁၁ နာရီခွဲခန့်ကလည်း ဆွဲလွဲအိုရွာမှ နဘတ်ကျေးရွာသို့ ထိုးစစ်ဆင်လာသော စစ်ကြောင်းအား မိုင်းကွင်းပေါ်ဖြတ်နေစဥ် မွမ်းမံပြုလုပ်ထားသော ပေါက်ကွဲအားမြင့် မိုင်းပဒေသာ သုံးလုံးတွဲဖြင့် ထပ်မံဖောက်ခွဲတိုက်ခိုက်ခဲ့ကြောင်း လျှပ်တစ်ပြက်စွန်ညို ပြောက်ကျားတပ်ဖွဲ့က ထုတ်ပြန်သည်။
အဆိုပါဖြစ်စဥ် နှစ်ခုဆောင်ရွက်ရာတွင် ဖောက်ခွဲရေး ဖုန်း နှစ်လုံး နှင့်အတူ ဘက်ထရီအိုး နှစ်လုံးဆုံးရှုံးခဲ့ကြောင်း၊ စစ်ကောင်စီဘက်က ထိခိုက်ဒဏ်ရာရသူနှင့် အသေအပျောက်များရှိကြောင်း လျှပ်တစ်ပြက်စွန်ညို ပြောက်ကျားတပ်ဖွဲ့က ဆိုသည်။
Public Service Announcement
စစ်ဆင်ရေးကို လျှပ်တစ်ပြက်စွန်ညို ပျောက်ကြားတပ်ဖွဲ့၊ B.C အထူးပြောက်ကျားတပ်ဖွဲ့၊ CHU တပ်ခွဲ(၃)၊ ဗိုလ်နေတိုး (BNT)၊ MS PDF အဖွဲ့တို့ ပူပေါင်းဆောင်ရွက်ခဲ့ခြင်းဖြစ်ပြီး မဟာမိတ်ရဲဘော်များ အထိအခိုက်မရှိ ဆုတ်ခွာနိုင်ခဲ့ကြောင်း အသိပေးထားသည်။
ဖြစ်စဥ်နှင့်ပတ်သက်၍ လျှပ်တစ်ပြက်စွန်ညို ပြောက်ကျားတပ်ဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
