Connect with us

Hi, what are you looking for?

သတင်း

လာမယ့် ရက်ပေါင်း ၆၀ အတွင်း ပါတီမှတ်ပုံပြန်မတင်ရင် ပါတီဖျက်မယ့် ဥပဒေစစ်ကောင်စီပြဌာန်း

နိုင်ငံရေးအကဲခတ်တွေက စစ်ကောင်စီရဲ့ ရွေးကောက်ပွဲဥပဒေသစ်မှာ အာဏာသိမ်းစစ်တပ်ကျောထောက်နောက်ခံပေးထားတဲ့ ကြံခိုင်ရေးပါတီကို အသာရစေတဲ့ ဥပဒေဖြစ်ပြီး NLD ပါတီကို ဖိနှိပ်ထားတဲ့ ဥပဒေ ဖြစ်တယ်လို့ သုံးသပ်ကြပါတယ်။

လာမယ့် ရက်ပေါင်း ၆၀ အတွင်း ပါတီမှတ်ပုံပြန်မတင်ရင် ပါတီဖျက်မယ့် ဥပဒေစစ်ကောင်စီပြဌာန်း
လာမယ့် ရက်ပေါင်း ၆၀ အတွင်း ပါတီမှတ်ပုံပြန်မတင်ရင် ပါတီဖျက်မယ့် ဥပဒေစစ်ကောင်စီပြဌာန်း

ယခင်နအဖ စစ်အစိုးရ လက်ထက်က ပြဌာန်းခဲ့တဲ့ နိုင်ငံရေးပါတီများ မှတ်ပုံတင် ဥပဒေကို စစ်ကောင်စီက ပယ်ဖျက်လိုက်ပြီး ပိုမိုတင်းကြပ်တဲ့ ဥပဒေသစ်ကို ဇန်နဝါရီလ ၂၆ ရက်က ပြဌာန်းလိုက်ပါတယ်။

စစ်ကောင်စီခေါင်းဆောင် လက်မှတ်ထိုးပြဌာန်းလိုက်တဲ့ ဥပဒေသစ်အရ နိုင်ငံရေးပါတီတွေအားလုံး လာမယ့်ရက်ပေါင်း ၆၀ အတွင်းပြန်လည်မှတ်ပုံတင်ရမှာဖြစ်ပြီး မှတ်ပုံမတင်ရင် ပါတီဖျက်သိမ်းဖို့စီစဉ်ထားတာပါ။

မနေ့က ပြဌာန်းလိုက်တဲ့ စစ်ကောင်စီရဲ့ နိုင်ငံရေးပါတီများမှတ်ပုံတင်ဥပဒေမှာအသစ်ဖြည့်စွက်ချက်တွေတွေ့ရပါတယ်။

တစ်နိုင်ငံလုံးအတိုင်းအတာနဲ့ ဝင်ပြိုင်မယ့် ပါတီတွေဟာ မှတ်ပုံတင်ခွင့်ပြုတဲ့ ရက်ကနေ ရက်ပေါင်း ၉၀ အတွင်းပါတီဝင်အင်အား တစ်သိန်း စုဆောင်းရမှာဖြစ်သလို မြန်မာ့စီးပွားရေး ဘဏ်မှာ ငွေကျပ်သိန်းတစ်ထောင်နဲ့ အကောင့်ဖွင့်ထားရမယ်လို့ အသစ်ဖြည့်စွက်ပါတယ်။

Public Service Announcement

Public Service Announcement

တိုင်းနဲ့ ပြည်နယ်အဆင့်ပြိုင်မယ့် ပါတီတွေကို ပါတီဝင်အင်အား တစ်ထောင်သာ စုဆောင်းခိုင်းပြီး ဘဏ်စာရင်းမှာလည်း ကျပ်သိန်းတစ်ရာဖွင့်ထားဖို့ စစ်ကောင်စီဥပဒေမှာ ထည့်သွင်းထားပါတယ်။

ရွေးကောက်ပွဲ ဝင်ပြိုင်ရာမှာလည်း တစ်နိုင်ငံလုံးအတိုင်းအတာနဲ့ ဝင်ပြိုင်မယ့် ပါတီတွေဟာ မဲဆန္ဒနယ်တွေအားလုံးရဲ့ ထက်ဝက်ကျော်ကို ဝင်ပြိုင်ရမှာဖြစ်ပါတယ်။ တိုင်းနဲ့ပြည်နယ်အဆင့် ပါတီတွေက သက်ဆိုင်ရာ ဒေသမှာရှိတဲ့ မဲဆန္ဒနယ် တစ်ခု အနည်းဆုံးဝင်ပြိုင်ရမှာပါ။

တစ်နိုင်ငံလုံးဝင်ပြိုင်မယ့် ပါတီတွေ မြို့နယ် ၁၅၀ ကျော်မှာ ပါတီရုံးခန်းဖွင့်လှစ်ထားရမယ်လို့ စစ်ကောင်စီဥပဒေသစ်မှာသတ်မှတ်ထားတာတွေ့ရပါတယ်။

အထွေထွေရွေးကောက်ပွဲ ကျင်းပပြီးမှ မှတ်ပုံတင်တဲ့ ပါတီတွေဟာ ကြားဖြတ်ရွေးကောက်ပွဲ တွေကို ဝင်ပြိုင်ခွင့်မရှိဘူးဆိုတဲ့အချက်ကိုလည်း စစ်ကောင်စီက ထည့်ရေးထားပါသေးတယ်။

ဒါအပြင် စစ်ကောင်စီရဲ့နိုင်ငံရေးပါတီမှတ်ပုံတင် ဥပဒေအသစ်မှာ အကြမ်းဖက်အဖြစ် သတ်မှတ်ထားတဲ့အဖွဲ့အစည်းတွေ ၊လူပုဂ္ဂိုလ် တွေနဲ့တိုက်ရိုက်ဖြစ်စေ ၊သွယ်ဝိုက်ပြီးဖြစ်စေ ပတ်သက်တဲ့သူတွေ ၊ထောင်ဒဏ်ချခံရသူတွေကို ပါတီဝင်အဖြစ် လက်မခံရဆိုတဲ့အချက်ကိုပါ အသားပေးပြီးထည့်ထားတာတွေ့ရပါတယ်။

အဲဒီအသစ်ဖြည့်စွက်ချက်တွေကို မလိုက်နာရင် ပါတီအဖြစ်ကနေ ဖျက်သိမ်းခံရမယ်လို့ စစ်ကောင်စီရဲ့ဥပဒေမှာပြောထားပါတယ်။

နိုင်ငံရေးအကဲခတ်တွေက စစ်ကောင်စီရဲ့ ရွေးကောက်ပွဲဥပဒေသစ်မှာ အာဏာသိမ်းစစ်တပ်ကျောထောက်နောက်ခံပေးထားတဲ့ ကြံခိုင်ရေးပါတီကို အသာရစေတဲ့ ဥပဒေဖြစ်ပြီး NLD ပါတီကို ဖိနှိပ်ထားတဲ့ ဥပဒေ ဖြစ်တယ်လို့ သုံးသပ်ကြပါတယ်။

NLD ပါတီဟာ ၂၀၂၀ အထွေထွေရွေးကောက်ပွဲရလဒ်ကိုသာ ဆုပ်ကိုင်ထားပြီး စစ်ကောင်စီရဲ့ရွေးကောက်ပွဲကို လုံးဝအသိအမှတ်ပြုမှာမဟုတ်ဘူးလို့ ထုတ်ပြန်ကြေညာထားပါတယ်။

NUG အစိုးရ ၊ အင်အားကြီးတိုင်းရင်းသားလက်နက်ကိုင်အဖွဲ့အချို့ နဲ့ တော်လှန်ရေးအင်အားစုတွေကလည်း စစ်ကောင်စီရဲ့ရွေးကောက်ပွဲကို လက်မခံဘူးလို့ တရားဝင်ပြောဆိုထားကြပါတယ်။

စစ်ကောင်စီခေါင်းဆောင်ကတော့ ဘယ်လိုအခြေအနေပဲဖြစ်စေ ရွေးကောက်ပွဲ မဖြစ်ဖြစ်အောင် လုပ်မယ်လို့ ပြီးခဲ့တဲ့ ရက်ပိုင်းက ထပ်မံပြောဆိုသွားခဲ့ပါတယ်။

ဆက်စပ်သတင်းများ

သတင်း

ဝိုင်းမော်တွင် အင်အားထောင်ချီစုစည်းကာ KIA သိမ်းပိုက်ထားသည့် ပန်ဝါ၊ ချီဖွေ၊ ကန်ပိုက်တီကို ထိုးစစ်ဆင်ရန် စစ်ကောင်စီပြင်ဆင်နေဟုဆို

သတင်း

လားရှိုးမြို့ပေါ် ရပ်ကွက်များအတွင်း PDF များရှိနေသည်ဟု ဆိုကာ စစ်ကောင်စီက လိုက်လံစစ်ဆေးနေပြီး လူငယ်သုံးဦးကိုလည်း TNLA တပ်ဖွဲ့ဝင်များဖြစ်သည်ဟုဆိုကာ ဖမ်းဆီးသွားကြောင်း ​​ဒေသခံအချို့က​ပြောသည်။

သတင်း

ပြည်သူတွေအပေါ် အကြမ်းဖက်မှုကျူးလွန်နေတဲ့ စစ်ကောင်စီအတွက် စစ်ဘက်ဆိုင်ရာကျွမ်းကျင်မှုသင်တန်းပေးနေတဲ့ ဘယ်လာရုစ်တက္ကသိုလ်တွေကို နိုင်ငံတကာပညာ‌ရေးအသိုင်းအဝိုင်းက သပိတ်မှောက်ဖို့နဲ့ ကန့်ကွက်ဖို့ Justice For Myanmar က တောင်းဆိုလိုက်သည်။