မြန်မာနိုင်ငံရဲ့အခြေအနေဟာ သာမန်မဟုတ်တဲ့အခြေအနေမှာ ရှိနေဆဲဖြစ်တယ်လို့ စစ်ကောင်စီခေါင်းဆောင်က ယာယီသမ္မတ တာဝန်ယူတဲ့ ဦးမြင့်ဆွေထံ တင်ပြတယ်လို့ သတင်းထုတ်လာပါတယ်။
ဒီနေ့မှာ ကာလုံအစည်းအဝေးခေါ်ယူကျင်းပတာဖြစ်ပြီး အာဏာသိမ်း စစ်ကောင်စီခေါင်းဆောင်က ၂ နှစ်တာကာလအတွင်းမြန်မာနိုင်ငံရဲ့အခြေအနေတွေကိုတင်ပြတာလို့ စစ်ကောင်စီထိန်းချုပ်မှုအောက်မှာရှိတဲ့ မီဒီယာတွေက ဖော်ပြပါတယ်။
CRPH၊ NUG နဲ့ PDF တွေဟာ အကြမ်းဖက်လုပ်ရပ်တွေလုပ်နေတယ်လို့ စစ်ကောင်စီခေါင်းဆောင်က စွပ်စွဲထားပြီး အဲဒီအဖွဲ့တွေကြောင့် တိုင်းပြည်ဟာ သာမာန်အခြေအနေမရောက်သေးဘူးလို့အကြောင်းပြပါတယ်။
ဒီနေ့ ကာလုံအစည်းအဝေးက ဆုံးဖြတ်ချက်တွေကို မနက်ဖြန် ဖေဖော်ဝါရီလ ၁ ရက်မှာ ထုတ်ပြန်မယ်လို့စစ်အုပ်စုက သတင်းထုတ်ပါတယ်။
Public Service Announcement
စစ်တပ်က စိတ်ကြိုက်ရေးဆွဲထားတဲ့ ၂၀၀၈ အခြေခံဥပဒေအရ နိုင်ငံကိုအရေးပေါ်ကာလ ၂ နှစ်အထိသာ ကြေညာလို့ရတာဖြစ်ပြီး ၂ နှစ်ပြည့်တဲ့နေ့မှာ ကာလုံလို့ခေါ်တဲ့ ကာကွယ်ရေးနဲ့လုံခြုံရေးကောင်စီထံကို အာဏာပြန်အပ်ရမှာဖြစ်ပါတယ်။
ဒါပေမယ့် နိုင်ငံဟာ သာမာန်မဟုတ်တဲ့အခြေအနေမှာဆက်ရှိနေရင် အရေးပေါ်ကာလကို ထပ်တိုးနိုင်သယောင် စစ်ဗိုလ်ချုပ်ဟောင်းအချို့က အာဏာသိမ်းကာလ ၂ နှစ်မပြည့်ခင် လပိုင်းအလိုတွေကတည်းက နှပ်ကြောင်းပေးတာတွေရှိခဲ့ပါတယ်။
မည်သို့ပင် ၂၀၀၈ အခြေခံဥပဒေက ပြဌာန်းထားပါစေ စစ်ကောင်စီခေါင်းဆောင်ဟာ အာဏာကို လက်လွှတ်မှာမဟုတ်ဘဲ အသွင်တမျိုးပြောင်းကာ ဆက်လက်ဆုပ်ကိုင်ထားမှာဖြစ်တယ်လို့ နိုင်ငံရေးအကဲခတ်တွေက သုံးသပ်ထားကြပါတယ်။
NUG အပါအဝင် စစ်ကောင်စီ ကိုတော်လှန်တိုက်ပွဲဝင်နေတဲ့ တိုင်းရင်းသားလက်နက်ကိုင်အဖွဲ့တွေကတော့ စစ်အုပ်စုဟာ ရွေးကောက်ခံအရပ်သားအစိုးရကို တရားမဝင်ဖြုတ်ချပြီး အာဏာသိမ်းကတည်းက ကိုင်တိုင်ရေးဆွဲထားတဲ့အခြေခံဥပဒေကိုချိုးဖောက်ပြီး နိုင်ငံတော်ပုန်ကန်မှုကို ကျုးလွန်တာလို့ သတ်မှတ်ထားကြပါတယ်။
ဒါအပြင် ၂၀၀၈ အခြေခံဥပဒေဟာလည်း ဖျက်သိမ်းပြီးဖြစ်တယ်လို့တရားဝင်ထုတ်ပြန်ကြေညာထားပြီးဖြစ်ပါတယ်။
၂၀၂၁ခုနှစ် ဖေဖော်ဝါရီလ ၁ ရက်မနက်ပိုင်း ရွေးကောက်ပွဲရလဒ်အရ ထွက်ပေါ်လာတဲ့ လွှတ်တော်အစည်းအဝေးတွေ မစတင်မီမှာ စစ်တပ်ဟာ အရပ်သားအစိုးရအဖွဲ့ခေါင်းဆောင်တွေကို ဖမ်းဆီးပြီးအာဏာသိမ်းခဲ့တာပါ။
အာဏာသိမ်းပြီးနောက် စစ်ကောင်စီခေါင်းဆောင်ဟာ ကာလုံအစည်းအဝေးခေါ်ပြီး စစ်တပ်က တင်မြှောက်ထားတဲ့ ဒုသမ္မတ ဦးမြင့်ဆွေကို ယာယီသမ္မတခန့်ပြီး တိုင်းပြည်ကိုအရေးပေါ်ကာလသတ်မှတ်ခဲ့တာပဲဖြစ်ပါတယ်။
