စစ်အာဏာရှင်ဆန့်ကျင်ရေး အသံတိတ်သပိတ်ဆင်နွှဲတဲ့ ဒီနေ့မှာ သပိတ်မစတင်မီ နာရီပိုင်းအလိုကပင် ရန်ကုန်မြို့က လမ်းပိုင်းအချို့မှာ စတင်တိတ်ဆိတ်သွားတာတွေ့ရပါတယ်။
အသံတိတ်သပိတ်ကို မနက် ၁၀ နာရီကနေ ညနေ ၃ နာရီအထိ ၅ နာရီကြာ ဆင်နွှဲမှာဖြစ်ပြီး လူထုတစ်ရပ်လုံး အိမ်ပြင်မထွက်ဘဲ ဘေးကင်းစွာ ပါဝင်ပေးကြဖို့ တော်လှန်ရေးအင်အားစုတွေ ၊သပိတ်ခေါင်းဆောင်တွေက တိုက်တွန်းထားပါတယ်။
သပိတ်စတင်မယ့်အချိန် ၁၀ နာရီမတိုင်ခင်ကပင် ရန်ကုန်မြို့မှာ အရေးပါတဲ့ ပြည်လမ်း ၊ ကမ္ဘာအေး ဘုရားလမ်းနဲ့ ပါရမီလမ်းမကြီးတွေမှာ ကားအသွားအလာနည်းပါးသွားတာတွေ့ရပါတယ်။
ဆင်ခြေဖုန်းမြို့နယ်တွေက ဈေးအချို့ဟာလည်း ဒီနေ့မှာခြောက်ကပ်နေတယ်လို့ ဒေသခံတွေဆီက စုံစိမ်းသိရပါတယ်။
အသံတိတ်သပိတ်ကို တန်ပြန်တဲ့အနေနဲ့ စစ်အုပ်စုဘက်ကလည်းလူစုပြီး လမ်းပေါ်ထွက်ကာ စစ်တပ်ထောက်ခံပွဲတွေ လုပ်ဖို့ရှိနေပါတယ်။
” ဟိုအုပ်စုလူတွေ ပဲ ကားပေါ် ဆောင်းဘောက်တင်ပြီး အချုပ်အခြာဘာညာ ဖွင့်ပြီးသွားတာတွေ့လိုက်တယ်” လို့ ရန်ကုန် ဆင်ခြေဖုန်းမြို့နယ်တစ်ခုမှာနေထိုင်တဲ့အမျိုးသမီးတစ်ဦးက ပြောပြပါတယ်။
စစ်အုပ်စုဟာ ဒီနေ့ နေ့လယ်ပိုင်းမှာ ရန်ကုန်မြို့တော်ခန်းမရှေ့မှာ လူ ၃၀၀ ခန့်နဲ့ စစ်တပ်ထောက်ခံပွဲလုပ်ဖို့ရှိပြီး မြို့လယ်ခေါင်အနီးပတ်ဝန်းကျင် မှာ ချီတက်ကြဖို့လည်းရှိနေပါတယ်။
