မန္တလေးတိုင်း မြို့သာမှ ငါန်းဇွန်မြို့နယ်သို့လာသည့် စစ်ကောင်စီတပ်ယာဥ်အား ပဒေသာမိုင်းများဖြင့် မိုင်းဆွဲတိုက်ခိုက်ရာ ဗိုလ်ကြီးတစ်ဦးသေဆုံးကြောင်း Myitnge – PDF မြို့ပြပြောက်ကျားအထူးတပ်ဖွဲ့ သတင်းနှင့် ပြန်ကြားရေး တာဝန်ခံက ပြောသည်။
ဖေဖော်ဝါရီ ၅ ရက် မွန်းတည့် ၁၂ နာရီဝန်းကျင်က မြို့သာမှ ငါးဇွန်မြို့သို့ ထွက်လာသော စစ်ကောင်စီတပ်ဖွဲ့၀င်များ လိုက်ပါလာသည့် ယာဥ်တစ်စီးကို တောင်လယ်တောနှင့်ရွာသာလမ်းကြားတွင် ပဒေသာမိုင်း (၇)လုံးဆွဲကာတိုက်ခိုက်ခဲ့ကြောင်း Myitnge – PDF သတင်းနှင့် ပြန်ကြားရေး တာဝန်ခံက ပြောသည်။
သို့သော် မိုင်း (၅)လုံးသာကွဲခဲ့ပြီး စစ်ကောင်စီတပ်ဖွဲ့၀င် အသက်မွေးမြူရေးသင်တန်းကျောင်း-၂မှ ဗိုလ်ကြီး ၀ကြီးဆိုသူ သေဆုံးကာ စစ်ကောင်စီတပ်ဖွဲ့ဝင် ငါးဦး ပြင်းထန်ဒဏ်ရာ ရရှိသွားကြောင်း Myitnge – PDF သတင်းနှင့် ပြန်ကြားရေး တာဝန်ခံက ပြောသည်။
“ ကားပေါ်မှာဆယ်ယောက်လောက်တော့ပါတယ်။ ဗိုလ်ကြီး၀ကြီးက စစ်တပ်ကုန်းရွာမှာနေတယ်လို့ သိရပါတယ်။ မြစ်သားဆေးရုံမှာ သေတယ်။” ဟု Myitnge – PDF မြို့ပြပြောက်ကျားအထူးတပ်ဖွဲ့ သတင်းနှင့် ပြန်ကြားရေး တာဝန်ခံက ပြောသည်။
ဗိုလ်ဝကြီးဆိုသူသည် မိတ္ထီလာမြို့တွင် သင်္ဂြိုလ်လိုက်ရပြီး မိုင်းထိခဲ့သည့်တပ်သား ငါးဦးလည်း အသက်အန္တရာယ်ထိခိုက်နိုင်ကြောင်း ဇာမဏီပြောက်ကျားတပ်ဖွဲ့တာဝန်ခံက ပြောသည်။
စစ်ကောင်စီတပ်၏ ထိခိုက်သေဆုံးမှုကို လူထုနွေဦးက သီးခြားအတည်ပြုနိုင်ခြင်း မရှိသေးပေ။
“ အဲဒီဖြစ်နဲ့ပတ်သက်ပြီး နောက်ဆက်တွဲ ကြားတဲ့သတင်းတွေကရှိတယ်။ အတည်ပြုမရနေလို့။” ဟု ဒေသခံတစ်ဦးက ပြောသည်။
ထို့အပြင် တော်လှန်ရေးအရှိန်မြှင့်နေ၍ မိုင်းထုတ်လုပ်ရေးကုန်ကျစရိတ်များနေသောကြောင့် ဝိုင်းဝန်းကူညီကြရန် ဇာမဏီပြောက်ကျားတပ်ဖွဲ့တာဝန်ခံက မေတ္တာရပ်ခံထားသည်။
အဆိုပါ စစ်ဆင်ရေးကို မန္တလေးခရိုင်၊အမှတ် (၅)တပ်ရင်း Myitnge – PDFနှင့်အတူဇာမဏီပြောက်ကျားတပ်ဖွဲ့နှင့် AH NYAR MYAY SPECIAL DEFENSE FORCE တို့ပူးပေါင်းတိုက်ခိုက်ခဲ့ကြောင်း အသိပေးထားသည်။
