ရှမ်းပြည်နယ် ကျိုင်းတုံ – မိုင်းဆတ် လမ်းပိုင်းတွင် ယာဥ်တစ်စီးအရှိန်လွန်၍ ပေ၁၀၀၀ ခန့်နက်သည့် ချောက်ထဲကျရာ လိုက်ပါလာသူ ငါးဦးသေဆုံးခဲ့ကြောင်း မီးသတ်တပ်ဖွဲ့က အသိပေးထားသည်။
ဖေဖော်ဝါရီ ၁၀ ရက် နံနက် ၁၀ နာရီခန့်တွင် ကျိုင်းတုံ – မိုင်းဆတ်လမ်း မိုင်တိုင်အမှတ် (၁၄/၂) နှင့် (၁၄/၃) ကြား၊ ပန်လီကျေးရွာအနီး၌ Revo အမျိုးအစား အဖြူရောင်ယာဉ်သည် အရှိန်မထိန်းနိုင်ဘဲ ချောက်ထဲသို့ ထိုးကျတိမ်းမှောက်ခဲ့ခြင်းဖြစ်သည်။
ယာဉ်တိမ်းမှောက်မှုကြောင့် လိုက်ပါလာသူ ၁၂ ဦးအနက် အမျိုးသား နှစ်ဦးနှင့် အမျိုးသမီး သုံးဦး အခင်းဖြစ်သည့်နေရာ၌ သေဆုံးခဲ့ပြီး အခြား ခုနစ်ဦးမှာ ထိခိုက်ဒဏ်ရာရရှိခဲ့သောကြောင့် လူမှုကူညီရေး အသင်းများက ကျိုင်းတုံဆေးရုံသို့ပို့ဆောင်ပေးခဲ့ကြောင်း မီးသတ်တပ်ဖွဲ့က ထုတ်ပြန်ထားသည်။
အဆိုပါယာဉ်တိမ်းမှောက်မှုဖြစ်သည့်နေရာသည် အဆင်းလမ်းရှည်သောကြောင့် ကားသမားများအနေဖြင့် သတိထား၍ မောင်းနှင်သင့်သည်ဟု ယာဉ်မောင်းတစ်ဦးက သတိပေးထားသည်။
Public Service Announcement
