ဒေါတမကြီးတိုက်ပွဲ၌ အရာရှိကိုင် ပစ္စတိုလေးလက်အပါအဝင် စစ်ကောင်စီ၏ လက်နက်မျိုးစုံ ၃၇လက် ကရင်နီပူးပေါင်းတပ် သိမ်းပိုက်ရရှိခဲ့

(၆၀)မမ ၂လက်၊ RPG ၂လက်၊ စက်သေနတ် ၈လက်ပါဝင်၊ အလောင်းလာကောက်သည့် တပ်တိုက်ခိုက်ခံရ၍ အလောင်းများထားထွက်ပြေးရ

ကရင်နီ(ကယား)ပြည်နယ် ဒီးမော့ဆိုမြို့နယ် ဒေါတမကြီးအုပ်စုအတွင်း၌ မတ်လ ၂၁ရက်က တိုက်ပွဲပြင်းထန်စွာဖြစ်ပွားခဲ့ရာ စစ်ကောင်စီတပ်က သေဆုံးထိခိုက်များပြားခဲ့ပြီး အလောင်းများပင်မကောင်နိုင်ဘဲ ထွက်ပြေးခဲ့ရသည့်အပြင် လက်နက်ခဲယမ်းမျိုးစုံ ၃၇လက် ကရင်နီပူးပေါင်းတပ်ဖွဲ့က သိမ်းဆည်းရရှိခဲ့သည်။

ဒေါတမကြီးတိုက်ပွဲ၌ စစ်ကောင်စီတပ်ထံမှ ပစ္စတို ၄လက်၊ လက်နက်ကြီး (၆၀)မမ ၂လက်၊ RPG ၂လက်၊ စက်သေနတ် ၈လက်၊ MA1နှင့် MA 3 လက်နက် ၂၀၊ MA4နှင့် ၇၉ ဗုံးပစ်လောင်ချာတွဲထားသည့် သေနတ် ၁လက် စုစုပေါင်း လက်နက်မျိုးစုံ ၃၇ လက်ရရှိခဲ့ကြောင်း တိုက်ပွဲ၌ပါဝင် သည့် ဖရူဆိုပြည်သူ့ကာကွယ်ရေးတပ်(PDF)က ဓာတ်ပုံများနှင့်တကွ ယနေ့ ထုတ်ပြန်ထားသည်။

ဒေါတမကြီးတိုက်ပွဲ၌ စစ်ကောင်စီတပ်က သေဆုံးထိခိုက်များပြားကြောင်း ကရင်နီစစ်ဘက်ဆိုင်ရာ သတင်းထုတ်ပြန်ရေးအဖွဲ့ ပြောရေးဆိုခွင့်ရှိသူ ခူညေးရယ်က မတ်လ ၂၂ရက်တွင် People’s Spring သို့ ပြောကြားထားသည်။

“ဒီနေ့သူတို့ ပြန်လာရှင်းတယ်လေ အဲဒီမှာ ထပ်ပြီး တိုက်ပွဲဖြစ်တယ်။ အဲဒီမှာအလောင်းတွေ ကျန်ခဲ့တယ်ပြောတယ်။ အရေအတွက်တော့ မသိရသေးဘူး။ ရရှိတဲ့ ပစ္စည်းတွေစာရင်းပြုစုနေတယ်။အကြမ်းအားဖြင့် သိရသလောက်က (၆၀) မမ နှစ်လက်ရတယ်အဲဒီလို သိရတယ်။ လက်နက်ငယ်တွေလည်း ရမှာပေါ့”ဟု ခူညေးရယ်က ပြောကြားခဲ့သည်။

Public Service Announcement

People’s Spring က ယမန်နေ့တွင် လက်ခံရရှိခဲ့သည့် ဓာတ်ပုံများအနက် စစ်ကောင်စီတပ်ထံမှ သိမ်းဆည်းရရှိခဲ့သည့် ဓာတ်ပုံများအပြင် စစ်ကောင်စီတပ်ဖွဲ့ဝင်အလောင်းများကိုလည်းတွေ့ရသည်။ တော်လှန်ရေးတပ်ဖွဲ့များက လိုက်လံကောက်ယူစုစည်းရာတွန် အလောင်းများကို တွန်းလှည်းပေါ်တင်ပြီး စုစည်းခဲ့သည့် ဓာတ်ပုံအချို့ကိုလည်း တွေ့ရသည်။

ယခုနှစ်ဆန်းပိုင်းအတွင်း ကရင်နီဒေသ၌ တိုက်ပွဲများ ပြင်းထန်နေပြီး စစ်ကောင်စီတပ်က အထိနာလျက်ရှိသည်။ လက်နက်ခဲယမ်းသိမ်းဆည်းရရှိမှု ဖြစ်စဉ်များ မကြာခဏ ရှိခဲ့ရာ ဖေဖော်ဝါရီလကုန်ပိုင်း တိုက်ပွဲ၌ စစ်ကောင်စီတပ်၏ (၁၂၀) မမ လက်နက်ကြီးကိုပင် တော်လှန်ရေးတပ်ဖွဲ့များက သိမ်းယူနိုင်ခဲ့သည့် ဖြစ်စဉ်ရှိခဲ့သည်။

အထိနာသည့် စစ်ကောင်စီတပ်သည် လေကြောင်း ပစ်ကူအင်အားအလုံးအရင်းဖြစ်စစ်ကူပေးတိုက်ခိုက်နေရသည်။

တိုက်ပွဲ၌ တပ်ရင်းမှူးအဆင့်အပါအဝင် စစ်ကောင်စီတပ်က သေဆုံးထိခိုက်များပြားလျက်ရှိရာ ဒေါတမကြီးတိုက်ပွဲ၌ တပ်ရင်းတစ်ခုလုံးနီးပါးအထိနာခဲ့ခြင်းဖြစ်သည်။

ဒေါတမကြီးတိုက်ပွဲ၌ စစ်ကောင်စီတပ်က ဘောလခဲမြို့မှ လက်နက်ကြီးပစ်ကူ (၁၀)ကြိမ်ထက်မနည်းပစ်ခတ်ခဲ့ကြောင်း၊ စစ်ကောင်စီတပ်က တိုက်လေယာဉ်နှစ်စီး (၆)ကြိမ်ထက်မနည်းပစ်ခတ်တိုက်ခိုက်ခဲ့ကြောင်း ကရင်နီစစ်ဘက်က ထုတ်ပြန်သည်။

ဒေါတမကြီး တိုက်ပွဲတွင် ကရင်နီပူးပေါင်းတပ်မှ ရဲဘော် တစ်ဦး ကျဆုံးပြီး ၂ဦး ဒဏ်ရာရခဲ့ကြောင်း ထုတ်ပြန်ထားသည်။