ပေါင်းတည်မြို့နယ်တွင်စစ်ကောင်စီက ဆောက်လုပ်နေသော သင်္ကြန်မဏ္ဍပ်အား ယနေ့(ဧပြီလ၉ရက်)နံနက်အစောပိုင်းတွင် ပြည်သူ့ကာကွယ်ရေးတပ်ဖွဲ့က အသံမိုင်းဖြင့်ဖောက်ခွဲ သတိပေးခဲ့သည်။
ပေါင်းတည်မြို့ရှိ ဆောက်လုပ်နေဆဲသင်္ကြန်မဏ္ဏပ်ကိုပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ တပ်ရင်း – ၃၆၀၁ တပ်ခွဲ – ၅ နွေဦးတပ်ဖွဲ့က မိုင်းဖောက်ခွဲသတိပေးခဲ့ခြင်းဖြစ်သည်။
” မိုင်းတစ်လုံးပဲသုံးပြီး ဖောက်ခွဲခဲ့ပါတယ်။ စစ်ကောင်စီကတော့ သင်္ကြန်ကို စည်အောင် သူ့ဝန်ထမ်းတွေနဲ့ လုပ်မှာ။ ပြည်သူတွေကတော့ ပူပေါင်းမှာမဟုတ်ပါဘူး”ဟု ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့မှ တာဝန်ရှိသူတစ်ဦးကပြောသည်။
စစ်ကောင်စီ၏ သင်္ကြန်မဏ္ဏပ်သည်ပေါင်းတည်မြို့၊ စျေး ၂ ရပ်ကွက် ဘုရားကြီးလမ်းတွင် တည်ရှိသည်။ ယနေ့ နံနက် ငါးနာရီခန့်တွင် ပေါက်ကွဲသံကျယ်လောင်စွာကြားရကြောင်း မြို့ခံများကပြောသည်။
Public Service Announcement
“ထိခိုက်မှုတော့မရှိခဲ့ဘူး။ သင်္ကြန်တွင်းမှာတော့ သတိနဲ့ သွားလာကြဖို့လိုတယ်။စစ်ကောင်စီအုပ်စုနဲ့ အနီးကပ်မနေကြဖို့လိုတယ်”ဟု ပေါင်းတည်မြို့ခံတစ်ဦးကပြောသည်။
ယခုမိုင်းဖောက်ခွဲမှုသည်ပေါင်းတည်မြို့နယ်တွင်စစ်ကောင်စီက၎င်းတို့၏အကျိုးစီးပွားအတွက်ဟန်ပြကျင်းပမည့် သင်္ကြန်ပွဲတော်အား သပိတ်မှောက်ဆန့်ကျင်ကြရန် တိုက်တွန်းသည့်အနေဖြင့် ဖောက်ခွဲခြင်းဟု ပဲခူးတိုင်းစစ်ဒေသခွဲက သတင်းထုတ်ပြန်ထားသည်။
အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ တောင်ပိုင်းစစ်ဆင်ရေးဒေသတွင်ပါဝင်သော ပဲခူးတိုင်းစစ်ဒေသခွဲတွင် စစ်ကောင်စီတပ်ဖွဲ့အားတိုက်ခိုက်မှုများ အရှိန်မြှင့်နေသည်ဟုလည်း အသိပေးထားသည်။
“ကျနော်တို့က ဒီထက်ပိုပြီးတော့ စစ်ရေးအရှိန်မြှင့်ပါမယ်။ ဒါကို ပြည်သူတွေက သိရှိနားလည်ပြီးလုံခြုံရေးသတိပိုရှိကြဖို့ လိုပါတယ်” ဟုပဲခူးတိုင်းစစ်ဒေသခွဲတာဝန်ရှိသူကပြောသည်။
