စစ်ကိုင်းတိုင်း ဒီပဲယင်းနှင့် ရေဦးမြို့နယ်ကြားရှိ အများပြည်သူသွားလာနေသော ကျေးရွာချင်းဆက်လမ်းပိုင်း လေးခုကို စစ်ကောင်စီက ဘူဒိုဇာဖြင့် ဖျက်ဆီးသွားကြောင်း သတင်းရရှိသည်။
ဒီပဲယင်းနှင့် ရေဦးမြို့နယ်ကြားရှိ ညောင်လှမူးဆုံလမ်းအပါအဝင် လေးနေရာကို စစ်ကောင်စီနှင့် ၎င်း၏ လက်ပါးစေပျူစောထီးများက ဘူဒိုဇာနှစ်စီးဖြင့် ဧပြီ ၉ရက်တွင် ဖျက်ဆီးသွားခြင်းဟု ရေဦးမြို့နယ်ပြည်သူ့ကာကွယ်ရေးတပ်ဖွဲ့မှ တာဝန်ရှိသူတစ်ဦးက ပြောသည်။
“နမခကဆင်းလာတဲ့ စစ်ကြောင်းတစ်ကြောင်းစာနဲ့ ပျူအင်အား ၅၉ယောက်ပါတဲ့အဖွဲ့က ဘယ်မှမဝင်ဘဲ လမ်းပိုင်းတွေကို ဖျက်ဆီးသွားတာ။ အဲ့လမ်းတွေက အများပြည်သူသွားလာနေတာပါ”ဟု ရေဦးမြို့နယ်ပြည်သူ့ကာကွယ်ရေးတပ်ဖွဲ့မှ တာဝန်ရှိသူတစ်ဦးက ပြောသည်။
ဒီပဲယင်းနှင့်ရေဦးမြို့နယ်ဆက်သွယ်သည့် အဓိကလမ်းမကြီးသည်ဒေသတွင်းစစ်ရေးအခြေအနေအရ အများပြည်သူသွားလာရန် မဆင်မပြေ၍ ကျေးရွာချင်းဆက်လမ်းများကို အဓိကထား၍ အသုံးပြုနေရစဉ် စစ်ကောင်စီက ဖက်ဆီးသွားခြင်းဖြစ်သည်။
Public Service Announcement
” တော်တော်ကို လူမဆန်တာဗျာ။သူတို့အဘတွေက အမိန့်ပေးရင် ကိုယ့်အမေကိုယ်တောင် ခွေးဇာတ်ခင်းမယ့်ကောင်တွေ။ အများပြည်သူသွားလာနေတဲ့လမ်းကို ဖျက်ဆီးတာဗျာ။ ဘာပြောရမှန်းတောင်မသိဘူး”ဟု ရေဦးမြို့ခံတစ်ဦးက ပြောသည်။
အဆိုပါလမ်းပိုင်းများ ဖျက်ဆီးသည့် စစ်ကောင်စီစစ်ကြောင်းကို ပြည်သူ့ကာကွယ်ရေးမဟာမိတ်များက နှစ်ကြိမ် မ်ိုင်းဆွဲတိုက်ခိုက်ခဲ့သည်။ စစ်ကောင်စီဘက်က ထိခိုက်မှုကို အတိအကျမသိရသေးကြောင်း ရေဦးမြို့နယ်ပြည်သူ့ကာကွယ်ရေးတပ်ဖွဲ့က ပြောသည်။
” သူတို့ ထိခိုက်ဒဏ်ရာရတာတွေ များတယ်။ အတိအကျတော့ ကျွန်တော်တို့ မသိရသေးပါဘူး” ဟု ဆိုသည်။
အဆိုပါစစ်ကောင်စီစစ်ကြောင်းသည် ယနေ့(ဧပြီ ၁ဝရက်)တွင် ရေးဦးမြို့ပေါ်ရှိ စစ်ကောင်စီတပ်ရင်းအတွင်းသို့ ဝင်ရောက်သွားသည်ဟု သတင်းရရှိသည်။ စစ်ကိုင်းတိုင်းဒေသကြီးအတွင်း တစ်ဆက်ထည်းထိစပ်နေသည့် ဘုတလင်၊ ဒီပဲယင်းနှင့် ရေဦးမြို့နယ်တို့တွင် စစ်ကောင်စီတပ်က အင်အားတိုးမြှင့်ထားပြီ စစ်ကြောင်းထိုးနေကြောင်း ဒေသခံပြည်သူ့ကာကွယ်ရေးတပ်ဖွဲ့များကပြောသည်။
