မကွေးတိုင်း ဆောမြို့နယ် တေးကျေးရွာကို စစ်ကောင်စီတပ်က လက်နက်ကြီးဖြင့် ပစ်ခတ်တိုက်ခိုက်ခဲ့၍ ဒေသခံ ပြည်သူ တစ်ဦး သေဆုံးပြီး သုံးဦးဒဏ်ရာရရှိခဲ့သည်ဟု ဒေသတွင်းသတင်းရင်းမြစ်က အသိပေးသည်။
ဧပြီ ၁၂ရက် ညနေ ၄နာရီတွင် ကျောက်ထုအမြှောက် တပ်မှ လက်နက်ကြီးများ အကြောင်းမဲ့ ရမ်းသမ်း ပစ်ခတ်သောကြောင့် တေးကျေးရွာအနီး လက်နက်ကြီးကျ ရောက်ပေါက်ကွဲ ခဲ့ခြင်းဖြစ်သည်ဟု ဆိုသည်။
“အပစ်မဲ့ပြည်သူ တစ်ဦးလက်နက်ကြီးကျည်ထိမှန် သေဆုံးကာ၊ သုံးဦးထိခိုက်ဒဏ်ရာရတယ်လို့ ကြားသိရပါတယ်။ တိုက်ပွဲမရှိဘဲ အမြှောက်တပ်မှ ယောကျေးရွာ ဘက်တွေကို အကြောင်းမဲ့ရမ်း သမ်းပစ်ခတ်နေတာပါ။ ကျေးရွာနေ သက်ကြီးရွယ်အိုများ၊ ခလေးငယ်များ၊ကိုယ်ဝန် သည်များ ကြောက်လန့်ပြီး ဘေးလွတ်ရာသို့ ထွက်ပြေးပုန်းရှောင်နေရတယ်လို့ ကြားသိရပါတယ်”ဟု ဒေသတွင်း သတင်းရင်းမြစ်က ၎င်း၏ လူမှုကွန်ရက် တွင် အသိပေး ရေးသားထားသည်။
ယမန်နေ့ ညပိုင်းကလည်း စစ်ကောင်စီတပ်သည် ဆောနှင့် နယ်မြေခြင်းဆက်စပ်နေသည့် မင်းတပ် မြို့နယ် တိုက်နယ် (၁)ဘက်ကို တိုက်လေယာဉ်ဖြင့် ဗုံး လေးလုံး ကြဲချတိုက်ခိုက်ခဲ့သည်။
Public Service Announcement
အဆိုပါ တိုက်ခိုက်မှုတွင် လူထိခိုက်မှုမရှိသော်လည်း နေအိမ်အချို့နှင့် ကျေးရွာဘုန်းကြီးကျောင်း ပျက်စီးမှု ရှိခဲ့သည်ဟု မင်းတပ် ချင်းကာကွယ်ရေးတပ်(CDF)က ထုတ်ပြန်ထားသည်။
အဆိုပါတိုက်နယ် အမှတ်(၁) နယ်မြေရှိနေရာ ပြည်သူများအနေဖြင့် တောင်ယာခင်းများသို့ သွားလာရာ၌ သတိထားရန်၊ မပေါက်ကွဲသေးသည့် လက်နက်ကြီး ဗုံးဆံများ တွေ့ပါက ကိုင်တွယ်ခြင်းမပြုဘဲ နီးစပ်ရာ ပြည်သူ့ကာကွယ်ရေးအဖွဲ့သို့ သတင်းပိုရန် မင်းတပ် ပြည်သူ့အုပ်ချုပ်ရေးအဖွဲ့ တာဝန်ရှိသူ ဆလိုင်းယောမာန်က လူမှုကွန်ရက်မှတဆင့် အသိပေးထားသည်။
မင်းတပ်မြို့နယ်တွင် ယခု ဧပြီလအတွင်း မင်းတပ် CDF၊ ယောဒေသကာကွယ်ရေးတပ်တို့ ပူးပေါင်းပြီး စစ်ကောင်စီတပ်ကို တိုက်ခိုက်လျက်ရှိရာ စစ်ကောင်စီတပ်ဖွဲ့ဝင်များ သေဆုံးထိခိုက်ရှိခဲ့သည်ဟု မင်းတပ် CDFက ထုတ်ပြန်ထားသည်။
