မကွေးတိုင်း ထီးလင်းမြို့နယ်ရှိ အကြည်ဘန်းကျေးရွာကို စစ်ကောင်စီက မေလ ၆ရက်တွင် ရွာလုံးကျွတ်နီးပါး မီးရှို့ဖျက်ဆီးခဲ့ပြီး ဒေသခံပြည်သူသုံးဦး သတ်ဖြတ်ခံရသည့် ရုပ်အလောင်းတွေ့ရှိကြောင်း ဒေသခံများက ပြောသည်။
အိမ်ခြေ ၂၀၀ကျော်ရှိသည် အကြည်ဘန်းကျေးရွာရှိ စစ်ကောင်စီတပ်က ရွာလုံးကျွတ်နီးပါးမီးရှို့ဖျက်ဆီးခဲ့ပြီးနောက် ကျေးရွာသားများကို ဖမ်းဆီးခဲ့ခြင်းဖြစ်သည်ဟုလည်း ဒေသခံများက ပြောသည်။
“ဘုန်ကြီးကျောင်းနဲ့ နေအိမ် ၁၀လုံးလောက်ပဲကျန်တော့တယ် ”ဟု ဒေသခံတစ်ဦးက ပြောသည်။
ဒေသကာကွယ်ရေးတပ်ဖွဲ့ဝင်များက ကျေးရွာအတွင်း နယ်မြေရှင်းလင်းရေးလုပ်ဆောင်စဉ် ရုပ်အလောင်း သုံးလောင်း တွေ့ရှိခဲ့ပြီး မည်သူ၊မည်ဝါဖြစ်သည်ကို အတည်မပြုနိုင်သေးကြောင်း အဆိုပါ ရဲဘော်များက ပြောသည်။
Public Service Announcement
ထီးလင်းမြို့နှင့် ကျောက်ထုမြို့မှ ထွက်လာသည့် အင်အား ၂၀၀ခန့်ရှိသည့် စစ်ကောင်စီတပ်စစ်ကြောင်းသည် မေလ ၅ ရက်တွင် အကြည်ဘန်းရွာကို ဝင်ရောက်ခဲ့ပြီး မေလ ၆ ရက်နံနက် ၁၀နာရီခန့်တွင် ရွာကို မီးရှို့ခဲ့ခြင်းဖြစ်သည်ဟု ဒေသခံများက ပြောသည်။
“ရွာသားအများစုကို ဓားစာခံအနေနဲ့ ဖမ်းထားတယ်။ မနက်ကတော့ ၁၀ယောက်ပြန်လွှတ်ပေးလိုက်တယ်။ ဖမ်းထားတာအများကြီး ကျန်သေးတယ်”ဟု အခြားဒေသခံတစ်ဦးက ပြောသည်။
အဆိုပါစစ်ကြောင်းသည် ယနေ့ (မေ ၇ရက်)တွင် အညာဘန်းရွာဝင်ရောက်သွားပြီး အနီးအနားဝန်းကျင်တွင်ကင်းပုန်းများ အမြောက်အမြားချထားသည်ဟုလည်း ဒေသခံကာကွယ်ရေးတပ်ဖွဲ့ဝင်တစ်ဦးက ပြောသည်။
လက်ရှိတွင် ထီးလင်းမြို့နယ်အတွင်း ဖုန်းလိုင်းနှင့်အင်တာနက်လိုင်းများကို ဖြတ်တောက်ထားသည်။ ကျေးရွာဒေသခံများလည်း ထွက်ပြေးတိမ်းရှောင်နေရသည်ဟုလည်း ဒေသခံများကပြောသည်။
●အမှားပြင်ဆက်ချက်▪︎ကနဦးရေးသားရာတွင် ထီးလင်းမြို့နယ်ဟုမှားယွင်းရေးသားဖော်ပြမိခဲ့ပါသည်။ မကွေးတိုင်း ထီးလင်းဟု ပြင်ဆင်ဖတ်ရှုပေးပါရန်။မှားယွင်းမှုအတွက် စာဖတ်ပရတ်သတ်ကိုတောင်းပန်အပ်ပါသည်။
