▪︎မကွေးရှိ ၊စစ်ကိုင်းတိုင်းရှိရေနံမှော်နှင့်ရေနံချက်ဖိုများကိုဒေသခံကာကွယ်ရေးတပ်များကစိုးမိုးထား၍ စစ်တပ်ကရပ်နားရန်ခြိမ်းခြောက်ခြင်းဖြစ်
မန္တလေးတိုင်း၊ ညောင်ဦးမြို့နယ်ရှိ တက်မရေနံမြေတွင် ရေနံတူးဖော်၊ထုတ်လုပ်၊သယ်ယူခြင်းကို စစ်ကောင်စီက မေ ၂၁ ရက်ကစ၍ ရပ်နားထားရန်တားမြစ်ကြောင်း ရေနံလုပ်ငန်းရှင်များကပြောသည်။
“ဒီရေနံမြေမှာက တရားမဝင်တူးတာတွေများပြီးသူတို့အခွန်အခမရလို့ ပိတ်လိုက်တာလို့ပြောတယ် ။ နောက်ပြီး PDFတွေကိုလည်း ငွေကြေးထောက်ပံ့နေတယ်ဆိုပြီး စွပ်စွဲတာလည်းပါတယ်”ဟု ရေနံလုပ်ငန်းရှင်တစ်ဦးကပြောသည်။
စစ်ကောင်စီထိန်းချုပ်ထားသည့် တက်မရေနံမြေလုပ်ငန်းရှင်များကော်မတီက တက်မရေနံမြေအတွင်း မေ ၂၁ ရက် ညနေ ၆နာရီမှ စတင်ပြီး ရေနံမြေအတွင်းရေနံကျင်းတွင်းဖော်ခြင်း၊ ထုတ်လုပ်ခြင်း၊ သယ်ဆောင်ခြင်း၊ ရောင်းချခြင်းများ မပြုလုပ်ရန် တားမြစ်လိုက်သည်။ လိုက်နာမှုမရှိပါက ဒေသန္တရဥပဒေများနှင့်အရေးယူသွားမည်ဟုလည်းခြိမ်းခြောက်ထားသည်။
တက်မရေနံမြေ(ရေနံမှော်)သည် ချောက်မြို့မှ ၁၄မိုင်အကွာ ညောင်ဦးမြို့နယ်အတွင်း၌ တည်ရှိသည့် ရေနံမှော်တစ်ခုဖြစ်သည်။ ထိုရေနံမှော်တွင် လိုင်စင်မရှိဘဲ တူးဖော်နေသည့် ရေနံလက်ယက်ကျင်းများရှိပြီး ၂၀၁၉ခုနှစ်က စာရင်းအရ ၁၇၀ ကျင်းရှိသည်။ စစ်တပ်အာဏာသိမ်းပြီးနောက် ထိုရေနံကျင်းများ ပိုမိုများပြားလာသည်ဟုလည်းဒေသခံရေနံလုပ်ငန်းရှင်အချို့ကဆိုသည်။
Public Service Announcement
စစ်ကိုင်းတိုင်းနှင့်မကွေးတိုင်းရှိ ရေနံမှော်နှင့် ရေနံချက်ဖိုလုပ်ငန်းများကို ဒေသခံကာကွယ်ရေးတပ်များက စိုးမိုးထား၍ ရေနံတူးဖော်ခြင်းလုပ်ငန်းများကို မေ ၂ ရက်က စတင်ပြီး စစ်ကောင်စီကရပ်ဆိုင်းခဲ့သည်။ ထိုအပြင် လိုင်စင်အသစ်ထုတ်ပေးခြင်း၊ သက်တမ်းတိုးမြှင့်ခြင်းစသည့်တိုကိုလည်း ရပ်ဆိုင်းကြောင်း စစ်ကောင်စီက ကြေညာခဲ့သည်။
ရေနံတူးဖော်ထုတ်လုပ်သယ်ယူရေးလုပ်ငန်းများသည် ဒေသခံကာကွယ်ရေးတပ်များအတွက် အဓိကဝင်ငွေလမ်းကြောင်းဖြစ်လာ၍ ၎င်းတို့ကို ဖြတ်တောက်ရန်အတွက် စစ်ကောင်စီဘက်က ရေနံတွင်းများပိတ်ပင်နေခြင်းဖြစ်သည်။
“ရေနံတွင်းတွေကို စစ်ကောင်စီဌာနက မကြီးကြပ်နိုင်တော့ဘဲ PDFတွေက ထိန်းချုပ်ထားတော့ သူတို့မရမယ့်အတူတူ လိုက်ပိတ်တာပါ”ဟု မြိုင်မြို့နယ်ရှိ ရေနံလုပ်ငန်းရှင်တစ်ဦးကပြောသည်။
ညောင်ဦးမြို့နယ်၊ တက်မရေနံမြေ (တက်မမှော်) အတွင်းရှိ စဉ့်ကူနယ်မြေ ရဲစခန်းမှူးနှင့် ရဲတပ်သားလေးဦးကို ပခုက္ကူ မြို့ပြပြောက်ကျားအဖွဲ့တစ်ခုက ၂၀၂၂ဒီဇင်ဘာလကဝင်ရောက်ပစ်ခတ်တိုက်ခိုက်ပြီး G3 နှစ်လက်နှင့်အူဇီ တစ်လက်ကို ကာကွယ်ရေးတပ်ဖွဲ့များက သိမ်းဆည်းယူခဲ့ဖူးသည်။
