စစ်ကိုင်းတိုင်း ဗန်းမောက်မြို့နယ်ရှိ နောင်ကုန်းကျေးရွာကို အာဏာသိမ်းစစ်ကောင်စီတပ်က လေကြောင်း တိုက်ခိုက်ခဲ့ရာ သက်ကြီးရွယ်အိုတစ်ဦးအပါအဝင် အရပ်သား နှစ်ဦး သေဆုံးခဲ့ရာ လေကြောင်း တိုက်ခိုက်ခံရမှု မှတ်တမ်းဓာတ်ပုံများကို Banmauk Revolution က ယနေ့ ထုတ်ပြန်ခဲ့သည်။
ဗန်းမောက်မြို့နယ် ကြောင်လည်ရွာ၌ မေလ ၂၀ရက်မှစ၍ တိုက်ပွဲများ ဆက်တိုက်ဖြစ်ပွားခဲ့ရာ စစ်ကောင်စီတပ်က အထိနာခဲ့ပြီး လေကြောင်း ပစ်ကူပေးခဲ့သည့်အပြင် မေလ ၂၅ရက်ညပိုင်းတွင် ကြောင်လည်ရွာနှင့် နောင်ကန်ရွာကို လေကြောင်းက ဗုံးကြဲတိုက်ခိုက်ခဲ့သည်။
နောင်လည်ရွာတွင် တိုက်ပွဲဖြစ်ပွားခြင်းမရှိဘဲ စစ်ကောင်စီတပ်က လေကြောင်း တိုက်ခိုက်ခဲ့ခြင်းဖြစ်သည်ဟု ဒေသတွင်း သတင်းရင်းမြစ်က ပြောသည်။
အဆိုပါတိုက်ခိုက်မှုကြောင့် နေအိမ် ၆လုံး ပျက်စီးပြီး အသက်(၆၆)နှစ်အရွယ် အမျိုးသားတစ်ဦးနှင့် အသက်(၃၃)နှစ်အရွယ် အမျိုးသမီးတစ်ဦးသေဆုံးခဲ့ကြောင်း Banmauk Revolutionက ယမန်နေ့တွင် ထုတ်ပြန်ခဲ့ပြီး ယနေ့တွင် မှတ်တမ်းဓာတ်ပုံများ ဖော်ပြခဲ့ခြင်းဖြစ်သည်။
Public Service Announcement
ဗန်းမောက်နှင့်ဆက်စပ်နေသည့် အင်းတော်မြို့နယ်တွင်လည်း တိုက်ပွဲများဖြစ်နေပြီး စစ်ကောင်စီတပ်က လေကြောင်းတိုက်ခိုက်၍ ဘုန်းကြီးကျောင်းအပါအဝင် အဆောက်အဦးပျက်စီးမှုရှိခဲ့ပြီး အသက်(၉၃)နှစ်အရွယ် အဘွားအိုတစ်ဦး ထိတ်လန့်ကာ အသက်ဆုံးရှုံးခဲ့ရသည်ဟု အင်းတော် PDF ရဲဘော်တစ်ဦးက ပြောသည်။
“သူတို့ စစ်ကောင်စီဘက်က အထိနာနေတော့ဆက်ပြီး လေကြောင်းတွေလည်း သုံးလာနိုင်တယ်။အဓိကတော့ အင်းတော် ဗန်းမောက်ဘက်မှာပေါ့။ အင်းတော်နဲ့ ဗန်းမောက်ဘက်မှာ အခုနောက်ပိုင်း သူတို့အဖိခံနေရတာ။ သူတို့ဘက်က ခံနေရတော့ လေကြောင်းတွေထပ်ပြီး သုံးလာနိုင်တော့ ပြည်သူတွေ စစ်နဲ့ရှောင်နိုင်သမျှ ရှောင်နိုင်အောင် သတိပေးချင်တယ်ဟု အင်းတော် PDF ရဲဘော်က ယမန်နေ့တွင် People’s Spring သို့ ပြောကြားထားသည်။
ဗန်းမောက်နယ် ကြောင်လည်ရွာအနီးတွင် မေလ ၂၀ရက်စ၍ ဒေသခံ ပြည်သူ့ကာကွယ်ရေးတပ်(PDF)များနှင့် စစ်ကောင်စီတပ်တို့ ၅ရက်ကြာ တိုက်ပွဲအတွင်း စစ်ကောင်စီတပ်က အရာရှိ အပါအဝင် သေဆုံးသူ ၃၀ဦးထက်မနည်းရှိနိုင်ပြီးနောက် စစ်ကောင်စီတပ်က လေကြောင်း ပစ်ကူပေးတိုက်ခိုက်ခဲ့ခြင်း ဖြစ်သည်။
