စစ်ကိုင်းတိုင်း ထီးချိုင့်နှင့် ကသာမြို့နယ်အစပ် ကျေးရွာများကို စစ်ကောင်စီက အင်အား ၂၀၀ ကျော်ပါသော စစ်ကြောင်းသုံးခုဖြင့် ဝင်ရောက် လာ၍ ဒေသခံများအနေဖြင့် စစ်ရေးသတိရှိရန်နှင့် ဘေးလွတ်ရာ ကြိုတင်တိမ်းရှောင်နေကြရန် ပြည်သူ့ကာကွယ်ရေးတပ်ဖွဲ့၊ ကသာခရိုင် တပ်ရင်း(၁)က အသိပေးထားသည်။
“စစ်တပ် စစ်ကြောင်းပြန်ဝင်လာပြီ။ ရွာတွေကို စစ်ကြောင်းထိုးနေတယ်။ ပြည်သူတွေ သတိရှိကြဖို့ စစ်ဒေသ(ကသာခရိုင် တပ်ရင်း၁)ကနေ သတိပေးထားတယ်”ဟု ကသာမြို့မှ ပြည်သူ့ကာကွယ်ရေးထောက်ပို့ရဲဘော်တစ်ဦးက ယနေ့(မေလ ၃၀ရက်) ပြောသည်။
စစ်ကောင်စီစစ်ကြောင်းသည် ထီးချိုင့်နှင့် ကသာနယ်တွင် နှစ်လခန့်ကြာ ငြိမ်သက်နေရာမှ ယခုရက်ပိုင်းအတွင်း တကျော့ပြန်စစ်ကြောင်းထိုးလာခြင်းဟု တော်လှန်ရေးးအင်အားစုများက ပြောသည်။
“ထီးချိုင့်၊ မြတောင်ဘက်ကနေ အေးရွာကိုဝင်လာတဲ့ စစ်ကြောင်းမှာ အင်အား ၁၂၀လောက်ပါတယ်။ ထီးချိုင့်မြို့နယ်ကနေ ဧရာဝတီမြစ်ဘေးအတိုင်း ဝင်လာတာက စစ်ကြောင်းနှစ်ကြောင်း။ တစ်ကြောင်းမှာ အင်အား ၆၀ လောက်ပါတယ်” ဟု ဒေသခံတစ်ဦးက ပြောသည်။
Public Service Announcement
စစ်ကောင်စီစစ်ကြောင်းတွင် အင်အားအများအပြားပါလာ၍ ထီးချိုင့်နှင့် ကသာနယ်စပ်ကျေးရွာများမှ ဒေသခံများ စစ်ရေးသတိရှိရန်နှင့် ဘေးလွတ်ရာ ကြိုတင်တိမ်းရှောင်နေကြရန် ပြည်သူ့ကာကွယ်ရေးတပ်ဖွဲ့၊ ကသာခရိုင် တပ်ရင်း (၁)က မေလ ၂၉ရက်တွင် သတိပေးထားကြောင်း ဒေသခံများက ပြောသည်။
ထီးချိုင့်နှင့် ကသာနယ်စပ်ဒေသများတွင် ပြည်သူ့ကာကွယ်ရေးတပ်များနှင့် စစ်ကောင်စီတပ်သည် ပြီးခဲ့သည့် မတ်လအတွင်းက တိုက်ပွဲအပြင်းအထန်ဖြစ်ပွားခဲ့သည်။ ကချင်ပြည်နယ်မှ ဆင်းလာသော ကျောက်စိမ်းများသယ်ဆောင်လာသည့် စစ်ကောင်စီယာဉ်တန်းကို ကသာ – ထီးချိုင့်လမ်းတွင် ပြည်သူ့ကာကွယ်ရေးတပ်များက တိုက်ခိုက်ခဲ့ခြင်း ဖြစ်သည်။
ထိုကာလကတိုက်ပွဲများတွင် စစ်ကောင်စီဘက်က ၂၀ဦးထက်မနည်း သေဆုံးခဲ့သည်ဟု ပြည်သူ့ကာကွယ်ရေတပ်ဖွဲ့များနှင့် ဒေသခံများက ပြောသည်။
အထိနာသွားသည့် စစ်ကောင်စီတပ်က ထီးချိုင့်မြို့နယ်ထဲမှ ကျောက်မှော်ကျေးရွာကို တစ်ရွာလုံးနီးပါး မီးရှို့ဖျက်ဆီးသွားသည်ဟု ဒေသခံများက ပြောသည်။
