မန္တလေးတိုင်း၊ ငါန်းဇွန်မြို့နယ်ရှိ ကျေးရွာတစ်ရွာသို့ တပ်စွဲရန်လာရောက်သော စစ်ကောင်စီတပ်အား ဒေသကာကွယ်ရေးအဖွဲ့များက တိုက်ခိုက်ခဲ့သည်။
မေလ ၂၇ ရက် ည ၁၀နာရီခန့်က ငါန်းဇွန်မြို့နယ်၊ ကုန်းလည်ရွာနှင့် နတ်ကြီးကျေးရွာကြားတွင် အင်အား ၄၀ခန့်ပါ စစ်ကောင်စီတပ်၏ စစ်ကား သုံးစီးကို ဒေသကာကွယ်ရေး မဟာမိတ်အဖွဲ့များ ပူးပေါင်းပြီး ပဒေသာမိုင်း ၁၅လုံးဖြင့် တိုက်ခိုက်ခဲ့ကြောင်း မန္တလေးခရိုင် အမှတ်(၅)တပ်ရင်း MN PDFက သတင်းထုတ်ပြန်သည်။
ထိုသို့တိုက်ခိုက်မှုကြောင့် စစ်သား နှစ်ဦး သေဆုံးပြီး အများအပြားထိခိုက်ဒဏ်ရာရရှိသွားကြောင်း MN PDFက ဆိုသည်။
“ကုန်းလည်မှာ ကင်းရှိမယ်။ ကုန်းလည်ကနေ နတ်ကြီးကိုကူးတာ။ အထိုင်ချဖို့ သားကျင်ရွာကိုတပ်ရွှေ့တာ။ စာသင်တိုက်တစ်တိုက်မှာ တပ်စွဲဖို့လုပ်တော့ စာသင်တိုက်က တံခါးကိုတော်တော်နဲ့ဖွင့်မပေးတော့ ဒေါကန်လာတဲ့အရှိန်နဲ့ သေနတ်တွေပစ်ဖောက်တယ်။နာရီဝက်လောက် စောင့်လိုက်ရတယ်ပြောတယ်။”ဟု ငါန်းဇွန်နယ်အခြေစိုက် TGYR အဖွဲ့ တာဝန်ခံက ပြောသည်။
Public Service Announcement
ထိခိုက်ဒဏ်ရာရခဲ့သည့် စစ်သားများကို ညတွင်းချင်း ငါန်းဇွန်မြို့သို့ပို့ဆောင်ခဲ့ကြောင်း သိရသည်။
“ဖောကားတစ်စီး ထွေလာတစ်စီး ဟိုက်ဂျက်တစ်စီး စုစုပေါင်း သုံးစီးပါဗျ။ ကုလားရွာကြီး မှာ တပ်စွဲထားပြီး ငါးဇွန်နယ်တဝိုက် စစ်ကြောင်းထိုးနေပါတယ်။ ပျူစောထီးတွေနဲ့ပေါင်းရင် ခန့်မှန်းအင်အား ၃၀လောက်ရှိပါတယ်”ဟု မန္တလေးခရိုင် အမှတ်(၅)တပ်ရင်း MN PDF အဖွဲ့၏ တာဝန်ခံက ပြောသည်။
စစ်ကောင်စီတပ်သည် ငါန်းဇွန်မြို့နယ်သို့ ယာဥ်နှစ်စီးဖြင့် ပြောင်းရွှေ့စဉ် တိုက်ခိုက်ခံရခြင်းဖြစ်ကြောင်း ငါန်းဇွန်သတင်းစုံက ဖော်ပြသည်။
အဆိုပါ စစ်ဆင်ရေးကို မန္တလေးခရိုင် အမှတ်(၅)တပ်ရင်း MN PDF၊ ဇာမဏီပြောက်ကျားတပ်ဖွဲ့ (ငါန်းဇွန်)၊ ငါန်းဇွန်မြို့နယ် (ပ.က.ဖ)၊ Special Tesk Force (Nga Zun -PDF)၊ ဖက်ဒရယ် ညီကိုပြည်သူ့ကာကွယ်ရေးနှင့်ထုတ်လုပ်ရေးအဖွဲ့၊ ပြည်သူ့အင်အားပြောက်ကျားတပ်ဖွဲ့၊ Myaung Ms PDF၊ ငန်းနက် ပြောက်ကျားတပ်ဖွဲ့၊ နောင်ရိုးအထူးပြောက်ကျားတပ်ဖွဲ့နှင့် TGYR အဖွဲ့တို့ ပူးပေါင်းတိုက်ခိုက်ခဲ့ကြောင်း အသိပေးထားသည်။
