စစ်ကိုင်းတိုင်း၊ စစ်ကိုင်း၊ ဝက်လက်နှင့် ခင်ဦးမြို့နယ် တွင် စစ်ကောင်စီတပ်က သုံးရက်အတွင်း ကျေးရွာ ၆ ရွာမီးရှို့ဖျက်ဆီးပြီး ဒေသခံပြည်သူနှစ်ဦးအား သတ်ဖြတ်သွားကြောင်း ဒေသတွင်းသတင်းရင်းမြစ်များက ပြောသည်။
ယမန်နေ့(မေလ ၂ ရက်)က စစ်ကိုင်းမြို့နယ် မြောက်ခြမ်း ပဒူကျေးရွာတွင် တပ်စွဲထားသော စစ်ကောင်စီတပ်က ကျောက်ပနန်ရွာနှင့် ရွာသစ်ကျေးရွာနှင့် ယနေ့ (ဇွန်လ ၃ ရက်)တွင် ပဒူကျေးရွာရှိ နေအိမ်များ မီးရှို့ဖျက်ဆီးသွားကြောင်း ဒေသတွင်းသတင်းရင်းမြစ်များက ပြောသည်။
“ပဒူက အခုတစ်ကြိမ်ထပ်ရှို့ခံရတာလည်း တော်တော်ပါတယ်ပြောတယ်။ ကျွန်တော်တို့ရွာနဲ့ နည်းနည်းလှမ်းပေမယ့် အထုပ်အပိုးတွေပြင်ထားရတယ်”ဟု စစ်ကိုင်းမြို့နယ်မြောက်ခြမ်းရှိ ကျေးရွာတစ်ရွာတွင် နေထိုင်သူတစ်ဦးက ပြောသည်။
အလားတူ ဝက်လက်နယ်အရှေ့ခြမ်းရှိ စစ်ကောင်စီတပ်သည် ယနေ့ မွန်းလွဲပိုင်းက တမာကန်ရွာနှင့် နဘဲပင်လှကျေးရွာကို မီးရှို့ဖျက်ဆီးခဲ့ကြောင်း၊ ထို့အပြင် နဘဲပင်လှရွာမှ အသက် (၂၃)နှစ် အရွယ် အမျိုးသား တစ်ဦးကို ပစ်သတ်ပြီး အသက် (၆၀)ခန့် အမျိုးသား တစ်ဦး ပေါင်ကျည်ထိမှန်ဒဏ်ရာရရှိထားကြောင်း Wet Let Informational Network အဖွဲ့က ပြောသည်။
Public Service Announcement
ထို့အပြင် ခင်ဦးမြို့နယ်တွင်လည်း စစ်ကောင်စီတပ်က ဇွန်လ ၁ ရက် နံနက်ပိုင်းတွင် ရွာသစ်ရွာမှ နေအိမ် ခုနစ်လုံးကို မီးရှို့ဖျက်ဆီးခဲ့ပြီး အသက်(၅၀)နှစ်အရွယ် အမျိုးသားတစ်ဦးကိုလည်း မူးသာကျေးရွာတွင် မီးရှို့သတ်ဖြတ်သွားခဲ့ကြောင်း ခင်ဦးမြို့နယ်သတင်းမှန်ပြန်ကြားရေးအဖွဲ့က ပြောသည်။
စစ်ကိုင်းနှင့်ဝက်လက်ရှိ မီးရှို့ဖျက်ဆီးခံကျေးရွာငါးရွာတွင် စစ်ကောင်စီတပ်ရှိနေဆဲဖြစ်၍ နေအိမ် အရေအတွက်မသိရသေးပေ။
ထို့အပြင် နယ် သုံးနယ်ရှိ ကျေးရွာအများအပြားမှ ဒေသခံသောင်းနှင့်ချီ ထွက်ပြေးတိမ်းရှောင်နေရပြီး အရေးပေါ်အကူအညီများ လိုအပ်နေကြောင်း ဒေသတွင်း လူမှုကယ်ဆယ်ရေးဆောင်ရွက်နေသူများက ပြောသည်။
စစ်ကိုင်း၊ ဝက်လက်နှင့် ခင်ဦးနယ်တို့တွင် ပြီးခဲ့သည့် မေလ ဒုတိယလဝက်အတွင်း စစ်ကောင်စီတပ်နှင့် ဒေသတွင်းတော်လှန်ရေးအင်အားစုများ တိုက်ပွဲများဖြစ်ပွားခဲ့သည်။
စစ်ကောင်စီတပ် အာဏာသိမ်းပြီးချိန်မှ၂၀၂၃ ဖေဖော်ဝါရီ၂၈ရက်အထိ အာဏာသိမ်းကာလအတွင်း စစ်ကောင်စီနှင့် လက်အောက်ခံအဖွဲ့အစည်းများက မီးရှို့ဖျက်ဆီးမှုကြောင့် အရပ်သားပြည်သူ နေအိမ်ပေါင်း ၆၀,၄၅၉ လုံး ပျက်စီးဆုံးရှုံးခဲ့ပြီး စစ်ကိုင်းတိုင်းတွင် ၄၇,၇၇၈ လုံးဖြင့် အများဆုံး မီးလောင်ပျက်စီးခဲ့သည်။
