ရေစကြိုနယ်ရှိ ထန်းချောင်းရွာ စစ်ကောင်စီတပ် မီးရှို့ဖျက်ဆီးစဥ် ဒရုန်းဖြင့် ဗုံးချတိုက်ခိုက်

▪︎နေအိမ် ၆၀ကျော် မီးလောင်ပြာကျပြီး ပြည်သူများကိုပါ ဖမ်းဆီးသွား

မကွေးတိုင်း၊ ရေစကြိုမြို့အနီးရှိ ထန်းချောင်းကျေးရွာကို စစ်ကောင်စီတပ်က မီးရှို့ဖျက်ဆီးနေစဥ် ဒရုန်းဖြင့် ဗုံးချတိုက်ခိုက်ခဲ့ကြောင်း ရေစကြိုမြို့နယ် ပြည်သူ့ကာကွယ်ရေးတပ်ဖွဲ့(ပကဖ)က ပြောသည်။

ယမန်နေ့ (ဇွန်လ ၄ ရက်)နံနက်က ရေစကြိုမြို့နယ်၊ ထန်းချောင်းကျေးရွာသို့ ဝင်ရောက်မီးရှို့ဖျက်ဆီးနေသော စစ်ကောင်စီတပ်အား ဒရုန်းဖြင့် အီနာဂါ လေးလုံးချကာ တိုက်ခိုက်ခဲ့ကြောင်း ရေစကြို(ပကဖ)အဖွဲ့က ပြောသည်။

တိုက်ခိုက်မှုကြောင့် စစ်ကောင်စီတပ်သား ခုနစ်ဦးခန့်ထိခိုက်ဒဏ်ရာများ ရရှိသွားကြောင်း ရေစကြို(ပကဖ)အဖွဲ့က ဆိုသည်။

စစ်ကောင်စီတပ်သည် ပျူများနှင့်အတူ ထန်းချောင်းရွာကို နံနက် ၄နာရီခွဲခန့်ကတည်းက ဝင်ရောက်ပြီး နေအိမ်များ မီးရှို့ဖျက်ဆီးသွားကြောင်း၊ အိမ်မွေးတိရစ္ဆာန်များ၊ ခိုင်းနွားများကိုလည်း မီးရှို့သတ်ဖြတ်သွားကြောင်း ဒေသခံများက ပြောသည်။

Public Service Announcement

“ထန်းချောင်းရွာကို မနက်လေးနာရီလောက်ဝင်စီးတယ်။ မြို့နဲ့နီးတော့ တိုက်လို့မလွယ်ဘူး။ ဒရုန်းနဲ့ပဲလိုက်ချတာ။ သစ်ပင်အောက်က သုံးကောင်လောက်က မှောက်သွားတယ်။ ကွက်တိကျတယ်။”ဟု ရေစကြို(ပကဖ)အဖွဲ့က ရဲဘော်ဝေကြီးက ပြောသည်။

ထန်းချောင်းကျေးရွာက နေအိမ် ၆၂လုံး မီးရှို့ဖျက်ဆီးခံရပြီး စစ်ကောင်စီတပ်က ဒေသခံပြည်သူအချို့ကိုပါ ဖမ်းဆီးခေါ်ဆောင်သွားကြောင်း ဒေသခံများက ပြောသည်။

ထို့အပြင် စစ်ကောင်စီတပ်သည် ညနေပိုင်းတွင် ရေစကြိုမြို့နယ် ထန်းဆယ်ပင်ကျေးရွာကိုလည်း ဝင်ရောက်မီးရှို့ဖျက်ဆီးသွားကြောင်း သတင်းရရှိသည်။