စစ်ကိုင်းတိုင်း၊ မြင်းမူမြို့နယ်ရှိ မူးမန္တလေးကျေးရွာအား စစ်ကောင်စီတပ်က မီးရှို့ဖျက်ဆီးနေ၍ ဒေသခံများ ညတွင်းချင်းထွက်ပြေးနေရကြောင်း သတင်းရရှိသည်။
ယနေ့ (ဇူလိုင် ၁၇ ရက်) ညနေပိုင်းက မူးမန္တလေးကျေးရွာအနီးတွင် စစ်ကောင်စီတပ်နှင့် ဒေသတွင်း PDFများ တိုက်ပွဲဖြစ်ပွားခဲ့ကြောင်း၊ ထိခိုက်ဒဏ်ရာရသွားသည့် စစ်သားများအား ထီးဆောင်းကျေးရွာသို့ သယ်ဆောင်သွားကြောင်း ဒေသကာကွယ်ရေးရဲဘော်တစ်ဦးက ပြောသည်။
ထို့နောက် ညနေ ၆ နာရီခန့်တွင် စစ်တပ်က မူးမန္တလေးရွာအား လက်နက်ကြီးများဖြင့်ပစ်ခတ်ကာ ဝင်ရောက်ခဲ့ကြောင်း၊ ည ၇ နာရီခန့်တွင် မူးမန္တလေးကျေးရွာအား မီးရှို့ဖျက်ဆီးနေ၍ ထိုကျေးရွာအပါအဝင် အနီးဝန်းကျင်ကျေးရွာများပါ ညတွင်းချင်းတိမ်းရှောင်နေရကြောင်း စစ်ကိုင်းမြို့နယ် သတင်းမှန်ပြန်ကြားရေးအဖွဲ့က ပြောသည်။
“အလ္လကပ္ပနဲ့ညောင်ပင်ကန်ဘက်ကို တစ်ကြောင်းထွက်သွားတယ်။ နောက်တစ်ကြောင်းက မူးမန္တလေးဘက်ကို မီးရှို့နေတယ်။”ဟု ဒေသတွင်းရဲဘော်တစ်ဦးက ပြောသည်။
Public Service Announcement
ယမန်နေ့ (ဇူလိုင် ၁၆ ရက်) ညပိုင်းကလည်း စစ်ကောင်စီတပ်သည် မြင်းမူမြို့နယ်၊ မဲနောကျေးရွာကို မီးရှို့ဖျက်ဆီးခဲ့ရာ နေအိမ် ၁၀၀ခန့် ပျက်စီးဆုံးရှုံးခဲ့ကြောင်း မြင်းမူမြို့နယ် သတင်းမှန်ပြန်ကြားရေးအဖွဲ့က ပြောသည်။
စစ်ကောင်စီတပ်သည် မြင်းမူနယ်အတွင်းရှိ ကျေးရွာများကို ဇူလိုင် ၆ ရက်မှစတင်ကာစစ်ကြောင်းထိုးပြီး ကျေးရွာ လေးရွာထက်မနည်း မီးရှို့ထားပြီး ဖမ်းဆီးသတ်ဖြတ်ခံရသူများလည်းရှိနေကြောင်း ဒေသခံများက ပြောသည်။
ထို့အပြင် ဇူလိုင် ၁၃ ရက်ကမူ စစ်ကောင်စီတပ်နှင့် ဒေသတွင်း PDF အဖွဲ့များ ခွက်ခွင်းရွာအနီး တိုက်ပွဲဖြစ်ပွားပြီး စစ်အုပ်စုအထိအခိုက်များကြောင်း တော်လှန်ရေးအင်အားစုများက ပြောသည်။
