မကွေးတိုင်း ပခုက္ကူမြို့နယ်တွင် ဘီယာဆိုင်တွင် သောက်နေသည့် စစ်ကောင်စီတပ်သား နှစ်ဦးကို ပစ်ခတ်ရှင်းလင်းခဲ့ကြောင်း အမျိုးသားညီညွတ်ရေးအစိုးရ(NUG)ကာကွယ်ရေးဝန်ကြီးဌာန ပြည်သူ့ကာကွယ်ရေးတပ်မတော်(PDF)စစ်ရုံးချုပ်က ယနေ့ ထုတ်ပြန်သည်။
ဇူလိုင် ၂၈ရက်က ပခုက္ကူမြို့နယ်၊ မြစ်ခြေ – ကမ္မလမ်းပိုင်းရှိ ဆုံစည်းရာ ဘီယာဆိုင်တွင် ဘီယာထိုင်သောက်နေသော ရန်သူ့တပ်သား နှစ်ဦးအား ပြည်သူ့ကာကွယ်ရေးတပ်မတော်(PDF)၊ ပခုက္ကူခရိုင် တပ်ရင်း(၈)က ပစ်ခတ်တိုက်ခိုက်ခဲ့ခြင်းဖြစ်သည်ဟု ဖော်ပြသည်။
ပစ်ခတ်စဉ် ဆိုင်ကယ်စီးပြီး ထွက်ပြေးသဖြင့် အနောက်မှ လိုက်လံပစ်ခတ်ခဲ့ကြောင်း၊ မြစ်ခြေ-ကမ္မလမ်းဘေးရှိ ရေမြောင်းထဲတွင် ကျည်ထိမှန်ဒဏ်ရာနှင့်လဲကျနေသော ရန်သူ့တပ်သား တစ်ဦးကို လက်နက်ချအညံ့မခံသဖြင့် အသေပစ်ခတ်တိုက်ခိုက်ခဲ့ကြောင်း ထုတ်ပြန်သည်။
ပစ်ခတ်မှုဖြစ်စဉ်အတွင်း ရန်သူ့တပ်သား နှစ်ဦး သေဆုံးကာ MA-1 (၂)လက်နှင့် ကျည် (၁၇) တောင့် သိမ်းဆည်းရရှိခဲ့သည်ဟု အသိပေးသည်။
Public Service Announcement
သိမ်းဆည်းရရှိခဲ့သည့် လက်နက် နှစ်လက်၏ ဓာတ်ပုံမှတ်တမ်းကိုလည်း ဖော်ပြခဲ့သည်။
ပခုက္ကူခရိုင်ရှိ PDF တပ်ရင်းများ၏ တိုက်ခိုက်မှုကြောင့် ဇူလိုင်အတွင်းက စစ်ကောင်စီတပ်နှင့် တိုက်ပွဲ ၂၀ကြိမ်ဖြစ်ပွားခဲ့ပြီး စစ်ကောင်စီတပ်သား ၆၀ကျော်သေဆုံးကာ အများအပြား ဒဏ်ရာရခဲ့ကြောင်း ကာကွယ်ရေးဝန်ကြီးဌာနက ထုတ်ပြန်ထားသည်။
