စောနွေဦး/People’s Spring
မကွေးတိုင်း အထက်မင်းလှမြို့နယ်၊ လက်ပံတံခါးကျေးရွာရှိ စစ်ကောင်စီ၏ နယ်မြေရဲစခန်းကို ယနေ့ နံနက်တွင် ဒေသခံကာကွယ်ရေးတပ်ဖွဲ့ ငါးဖွဲ့က ဝင်ရောက်တိုက်ခိုက်ရာ စစ်ကောင်စီတပ်သား ငါးဦးသေဆုံးခဲ့သည်ဟု လူထုတော်လှန်ရေးမဟာမိတ်အင်အားစု – PRA (Magway)မှ တာဝန်ရှိသူက ပြောသည်။
အဆိုပါနယ်မြေရဲစခန်းကို ယနေ့ (စက်တင်ဘာ ၂၆ ရက်) နံနက် ၁ နာရီ ၂၇ မိနစ်မှစတင်ပြီး ၄၅ မိနစ်ကြာ တိုက်ခိုက်ခဲ့ခြင်းဖြစ်ပြီး စစ်ကောင်စီဘက်က လက်နက်ကြီးနှင့် စက်လတ်များဖြင့် ပစ်ခတ်မှုကြောင့် စခန်းသိမ်းနိုင်ခြင်းမရှိခဲ့ကြောင်းလည်း အဆိုပါတပ်ဖွဲ့များက သတင်းထုတ်ပြန်ထားသည်။
တိုက်ခိုက်မှုအတွင်း လက်ပံတံခါးရဲစခန်းမှ စစ်ကောင်စီတပ်သား ငါးဦးသေဆုံးခဲ့ကြောင်း အတည်ပြုနိုင်ခဲ့သည်ဟုလည်း အဆိုပါအဖွဲ့များက ထုတ်ပြန်ထားသည်။ ထို့အပြင် ဒဏ်ရာရသူလည်းရှိကြောင်းလည်း ယင်းအဖွဲ့များက ဆိုသည်။ ထို့အပြင် ကာကွယ်ရေးတပ် ရဲဘော်များမှာ အထိအခိုက်မရှိပြန်လည်ဆုတ်ခွာနိုင်ခဲ့သည်ဟု ထုတ်ပြန်ထားသည်။
Public Service Announcement
“PRA မကွေးအနေနဲ့ မကွေးတိုင်းဒေသကြီးမှာ ဧရာဝတီမြစ်နောက်ဘက်ခြမ်း လွတ်မြောက်ရေးကို ဒေသတွင်းမှာရှိတဲ့ PDFတပ်ဖွဲ့ဝင်တွေ၊ ပကဖတွေနဲ့ ပူးပေါင်းသွားမယ်ဆိုတဲ့ ကြွေးကြော်သံနဲ့ တစိုက်မတ်မတ်သွားနေပါတယ်။ လက်ပံတံခါးဟာ လှုပ်ရှားနယ်မြေထဲမှာရှိတဲ့ စစ်ရေးပစ်မှတ်တစ်ခုဖြစ်ပါတယ်”ဟု PRA (Magway)မှ တာဝန်ရှိသူတစ်ဦးက ပြောသည်။
စစ်ကောင်စီတပ်သည် အဆိုပါနယ်မြေရဲကင်းတိုက်ခိုက်ခံရပြီးနောက် ကာကွယ်ရေးပစ္စည်းထုတ်စက်ရုံ(ကပစ)မှ စစ်ကား သုံးစီးဖြင့် လက်ပံတံခါးစခန်း ရောက်လာပြီး နယ်မြေရှင်းလင်းရေးလုပ်နေသည်ဟု ၎င်းက ဆက်ပြောသည်။
အဆိုပါတိုက်ပွဲကို အရှိချင်းကာကွယ်ရေးတပ် (ACDF)၊ လူထုတော်လှန်ရေးမဟာမိတ် အင်အားစု (PRA Magway) ၊ အထက်မင်းလှ – ပကဖ၊ မကွေးတောင်ပိုင်း ပြည်သူ့ကာကွယ်ရေးတပ်ဖွဲ ( မကွေး ပကဖ ) ၊ နှင့် Key of Revolutionပြောက်ကျားတပ်ဖွဲ့တို့က ပူးပေါင်းတိုက်ခိုက်ခဲ့ခြင်းဖြစ်သည်။
